ގދ. ތިނަދުއަށް ސިޓީއެއްގެ ދަރަޖަ ދީފައި ވަނީ ގާނޫނާ ހިލާފަށް ކަމަށް ކަނޑައަޅައިދިނުމަށް ކޯޓަށް މައްސަލަ ހުށަހެޅުމުން އެންވަޔަރަމެންޓް މިނިސްޓްރީގެ ޑެޕިއުޓީ މިނިސްޓަރު މުހައްމަގު ރާގިބު އަހްމަދު އެ މަގާމުން ވަކިކޮށްފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު ވަނީ އެކަން ކަށަވަރުކޮށްދެއްވާފަ އެވެ.

ރާގިބު ކޯޓަށް މައްސަލަ ހުށަހެޅީ ތިނަދޫގެ އާބާދީގައި 10،000 ހަމަނުވާ ކަމަށް ބުނެ އެވެ.

ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން އެލްޖީއޭއަށް ފޮނުވި ސިޓީއެއްގައި ވަނީ އެ ޑިޕާޓްމަންޓްގެ ރެކޯޑުތަކުން ދައްކާގޮތުގައި ތިނަދޫގެ އާބާދީ އަކީ 7،849 ކަމަށެވެ. އަދި ތިނަދޫ ކައުންސިލުން ފޮނުވި އެ ރަށު އާބާދީގެ ލިސްޓްގައި 307 މީހެއްގެ ނަން ތަކުރާރުވެފައިވާ ކަމަށް ބަޔާންކޮށް އެލްޖީއޭ އިން ތިނަދޫ ކައުންސިލަށް ފޮނުވި ސިޓީއެއް ވަނީ ސޯޝަލް މީޑިއާގައި އާންމުވެފަ އެވެ.

ޑެޕިއުޓީ މިނިސްޓަރުކަމުން ވަކިކުރި ރާގިބަކީ އެ މަގާމުގައި ހުރެ މީގެކުރިން ވެސް ދައުލަތާ ދެކޮޅަށް ކޯޓްތަކުގައި ވަކާލާތުކޮށްފައިވާ ވަކީލެކެވެ.