މުއައްސަސާތަކުގެ އަގު ވައްޓާލާގޮތަށް ޝަރީއަތަށް ސާބިތުނުވާ ކަންކަމުގެ މައްޗަށް ބިނާކޮށް މަޖިލީހުގައި ވާހަކަދައްކައިގެން ނުވާނެ ކަމަށް ބުނެ، އެންސްޕާއަށް ކުރާ ހިޔާނާތުގެ ތުހުމަތާއި ގުޅޭ ގޮތުން ވާހަކަ ދެއްކުން ރައްޔިތުންގެ މަޖިލީހުގެ ރިޔާސަތުން ހުއްޓުވައިފި އެވެ.

ރައީސް މުހައްމަދު މުއިއްޒު ޕްރޮމޯޓްކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި "އެމްއެމް ޓީވީ" ޗެނަލް ހިންގާ އިމާރާތުގެ ކުލީގެ ގޮތުގައި އެންސްޕާގެ ބަޖެޓުން 34.8 މިލިއަން ރުފިޔާ ހޭދަކުރިކަމަށް ވަނީ ތުހުމަތުތަކެއް ކޮށްފަ އެވެ.

މިކަމާއި ގުޅިގެން ގަލޮޅު ދެކުނު ދާއިރާގެ މަޖިލިސް މެންބަރު މީކާއިލް ނަސީމް މިއަދު މަޖިލީހުގައި އެވާހަކަ ދައްކަވަން ފެއްޓެވުމުން މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެވާހަކަ ހުއްޓުވާފަ އެވެ.

އަބްދުއްރަހީމް މެންބަރު މީކާއިލް ހުއްޓުވީ ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު އިގުތިސާދީ ކޮމިޓީން ފާސްކުރި ރިޕޯޓަށް ބަހުސް ކުރައްވަމުން، އެންސްޕާއަށް ކުރެވޭ ތުހުމަތުތަކުގެ ވާހަކަ ދައްކަވަން ފެއްޓެވުމުންނެވެ.

މީކާއިލް ވިދާޅުވީ ރައީސުލްޖުމްހޫރިއްޔާގެ ސިޔާސީ އެޖެންޑާ ފެތުރުމަށް ދައުލަތުގެ މުއައްސަސާތަކާއި ސަރުކާރުގެ ކުންފުނިތަކުގެ މުވައްޒަފުން ބޭނުން ކުރުމަކީ ހިޔާނާތް ކަމަށެވެ. އަދި އެކަންކަން ބަލަން ޖެހޭނެ ކަމަށެވެ.

އެވާހަކަ ހުއްޓުވަމުން އަބްދުއްރަހީމް ވިދާޅުވީ ހީވާ ހީވުމެއްގެ މައްޗަށް ބިނާކޮށް ސޯޝަލްމީޑިއާގައި ފެތުރޭ ހަބަރުތަކުގެ ވާހަކަދައްކަން ފުރުސަތު ނުދެވޭނެކަމަށެވެ. ނަމަވެސް ފަހުންވެސް މީކައީލްގެ ވާހަކަ އެގޮތަށް ކުރިއަށް ގެންދެވުމުން އަބްދުއްރަހީމް ވިދާޅުވީ މަޖިލިސް މެންބަރުން މަޖިލީހުގައި ވާހަކަދައްކަވަން ޖެހޭނީ މެންބަރުންގެ އިއްޒަތްތެރިކަން ނުގެއްލޭ ގޮތަށް ކަމަށެވެ.

"އިއްޒަތްތެރި މެންބަރު، އަޅުގަނޑަށް ޖެހޭނީ ތިގޮތަށް ވާހަކަފުޅު ބައްޓަން ކުރައްވާ ކަމަށް ވަންޏާ ފުރުސަތު ބަންދުކޮށްލަން، އެއީ ހަމަ ހަގީގަތުގައި ވެސް ދައުލަތުގެ މުއައްސަސާތަކުގެ އަގު ވައްޓައިލެވޭ ގޮތަށް ހަގީގަތެއް ނެތް ނުވަތަ ޝަރީއަތަށް ސާބިތުނުވާ ކަންކަމުގެ މައްޗަށް ބިނާކޮށް ވާހަކަ ދެއްކުމަކީ އެއީ ކޮށްގެން ވާނެ ކަމެއް ނޫން" އަބްދުއްރަހީމް ދެވަނަ ފަހަރު މީކާއިލް ހުއްޓުވަމުން ވިދާޅުވި އެވެ.

އެހެން ވިދާޅުވުމަށްފަހު އެމްޑީޕީއަށް ކަނޑައަޅާފައިވާ ވަގުތު ހަމަވީކަމަށް ވިދާޅުވެ އަބްދުއްރަހީމް މައިކް ކަނޑާލެއްވި އެވެ. އެކަމާއި ގުޅިގެން ވާހަކަދެއްކުމަށް އެކަށީގެންވާ ވަރުގެ ވަގުތެއް ނުދެއްވުމުން ނިޒާމީ ނުކުތާއެއް ނަންގަވާ. މީކާއިލް އެކަމާ ކަންބޮޑުވުން ފާޅުކުރެއްވި އެވެ.

ފާހަގަކޮށްލެވޭ ގޮތުގައި މެންބަރު މީކާއިލްގެ ވާހަކަ ހުއްޓުވުމަށް އަބްދުއްރަހީމްގެ އިތުރުން ޕީއެންސީގެ ޕީޖީ ލީޑަރު އިނގުރައިދޫ ދައިރާގެ މެންބަރު، އިބްރާހިމް ފަލާހު އާއި ހޯރަފުށީ ދާއިރާގެ ޕީއެންސީ މެންބަރު އަލީ މޫސާ ވެސް ވަނީ ނިޒާމީ ނުކުތާ ނަންގަވާފަ އެވެ.

އެންސްޕާއިން ރޯމާދުވާލު ހާމަކަން ބޮޑުގޮތަކަށް ހިންގާފައިވާ ހިޔާނާތާއި ގުޅިގެން އެ އެޖެންސީން ބުނެފައިވަނީ އިމާރާތް ކުއްޔަށް ހިފުމަށް އެމްއެމް ޓީވީ ހިންގާ މޯލްޑިވްސް މީޑިއާ ހައުސް ކުންފުންޏާއެކު އެއްބަސްވުން ހަދާފައިވާނީ "އުސޫލުގެ ތެރެއިން" ކަމަށެވެ.