މުނިފޫހި ފިލުވުމުގެ ދާއިރާގައި އެންމެ އަގުބޮޑު ތަރިންނަށް ވިސްނާލުމުން ހިތަށް އަންނަނީ މިހާރުވެސް އަހަރުމެންގެ ކަންފަތާ ރައްޓެހި ނަންނަމެވެ.

އެގޮތުން ޓޮމް ކްރޫޒްއާއި ޝާހްރުކް ޚާން ފަދަ ތަރިންނަކީ ދުނިޔޭގެ އެންމެ އަގުބޮޑު އެކްޓަރުންގެ ލިސްޓުގައި ހިމެނޭ ތަރިންނެވެ. އެހެން ނަމަވެސް ތާރީހުގައި އެއް ފިލްމަކަށް އެންމެ ބޮޑު އަގެއް ނެގި ތަރިއެއްގެ ރެކޯޑު އޮތީ މުޅިން އެހެން ތަރިއަކަށެވެ.

މީގެ 60 އަކަށް އަހަރު ކުރިއަށް ބަލާލާއިރު ހޮލީވުޑްގެ ބައެއް ތަރިން އެމީހުންގެ ފިލްމުތަކަށް މިލިއަނުން އަގު ނަގަމުން އައެވެ. އެހެން ނަމަވެސް އޭގެ 40 އަހަރު ފަހުން އެއަށްވުރެ 100 ގުނަ އިތުރު އަގަކާއެކު އެކްޓަރަކު ވަނީ ރެކޯޑެއް ހަދާފަ އެވެ. އެއީ 90 އަހަރުތަކުގައި ނެރުނު ފިލްމު "ދަ މެޓްރިކްސް"އިން ވިދާލި ކައެނޫ ރީވްސް އެވެ. އެ ފިލްމަށް ލިބުނު ބޮޑު ކާމިޔާބާއެކު ހޮލީވުޑްގައި ރީވްސްއަށް އޮތް ޑިމާންޑް ބޮޑުވި އެވެ.

އެގޮތުން ޖެހިގެން އައި އަހަރުތަކުގައި ވާނަސް ބްރޯސްއިން ވަނީ ރީވްސްއާއެކު ދެ ފިލްމަކަށް ސޮއިކޮށްފަ އެވެ. އެއީ 2003 ވަނަ އަހަރު ރިލީޒް ކުރެވުނު "ރީލޯޑަޑް" އަދި "ރިވޮލޫޝަންސް" އެވެ.

މި ދެ ފިލްމަށް ސޮއިކުރުމުގެ އަގެއްގެ ގޮތުގައި އޭނާއަށް 30 މިލިއަން ޑޮލަރު ލިބުނުއިރު ފައިދާގެ ހިއްސާއާއެކު އެ ފިލްމުން އޭނާއަށް ލިބުނު ޖުމްލަ އާމްދަނީ 156 މިލިއަން ޑޮލަރަށް އަރަ އެވެ.

މިއީ މީގެ ކުރިން ދުނިޔޭގެ އެއްވެސް ތަރިއަކަށް އެއް ފިލްމަކުން ލިބިފައިނުވާ ވަރުގެ ބޮޑު ކާމިޔާބީ އެކެވެ. އޭގެ ފަހުން 20 އަހަރު ވީއިރު ވެސް އެ ރެކޯޑު އެއްވެސް އެހެން އެކްޓަރަކަށް މުގުރާލެވިފައެއް ވެސް ނުވެ އެވެ.