މާލެއާ 900 ކިލޯމީޓަރު ދުރުން މިއަދު ބިންހެލުމެއް އަތުވެއްޖެ އެވެ.

މޫސުމާ ބެހޭ ގައުމީ އިދާރާ، މެޓް އޮފީހުން ބުނީ 4.7 މެގްނިޓިއުޑްގެ ބާރުމިނުގައި އައި މި ބިންހެލުމުގެ އަސަރު ރާއްޖެއަށް ނުކުރާނެކަމަށެވެ. އަދި ނުރައްކަލެއް ނެތް ކަމަށް ވެސް އެ އިދާރާއިން ބުންޏެވެ.

އެ ބިން ހެލުން އައިސްފައި ވަނީ މާލެއާ 912 ކިލޯމީޓަރު ދުރަށް ކަމަށް ވެސް މެޓް އޮފީހުން ބުންޏެވެ.

ބިންހެލުން އައިސްފައިވަނީ މިއަދު މެންދުރު ފަހު 1:38 ގައި، އިންޑިއާ ކަނޑުގެ އަޑީގައި އޮންނަ ކާލްސްބާގް ރިޖް ސަރަހައްދަށެވެ. އެއީ ރާއްޖެއާ އެންމެ ކައިރީގައި އޮންނަ ޓެކްޓޯނިކް ޕްލޭޓެވެ. ރާއްޖެއިން އެ ސަރަހައްދާ އެންމެ ކައިރީގައި އޮންނަނީ އައްޑު އަތޮޅެވެ.

މީގެ ކުރިންވެސް އެކި ފަހަރުމަތިން ބިންހެލުން އައިސްފައިވާ އެ ސަރަހައްދަށް އެންމެ ބާރުގަދަ ބިންހެލުމެއް އައިސްފައި ވަނީ ޖުލައި 15، 2003 ގަ އެވެ. އެއީ 7.6 މެގްނިޓިއުޑްގެ ބާރުމިނުގަ އެވެ.

ރާއްޖެއަށް ގިނަފަހަރު މިފަދަ ބިންހެލުންތަކުގެ އަސަރު ނުކުރިނަމަވެސް، ޑިސެމްބަރު 26، 2004 ގައި އިންޑޮނޭޝިއާގެ ސުމަޓްރާގެ އައްސޭރީގައި ކަނޑުއަޑީގައި އައި ބާރުގަދަ ބިންހެލުމުގެ ސަބަބުން ސުނާމީއެއްގެ އަސަރު ރާއްޖޭއަށް ވަރަށް ބޮޑަށް ކުރި އެވެ.