އެމްޑީޕީގެ އިސް މެމްބަރެއްގެ ނަން ޕީއެންސީގެ ދަފުތަރުގައި ޖެއްސުމުން އެ މައްސަލަ ބަލަން މިހާރު ވަނީ ކަމާ ބެހޭ ފަރާތްތަކަށް ހުށަހަޅާފަ އެވެ. ޕާޓި ބަދަލުކުރުމަށް އިލެކްޝަންސް ކޮމިޝަނަށް ހުށަހެޅި ފޯމުގައި ފޮޓޯ އާއި ސޮއި ވެސް އޮތީ ނުބައިކޮށް ކަމަށްވެ އެވެ. އެހެން ނަމަވެސް ޕާޓީ ބަދަލުވެއްޖެ އެވެ. ޕީއެންސީގެ މެންބަރުން އިތުރުކުރުމަށް ހިފާފައިވާ ފޯރީގެ ތެރެއިން މިފަދަ އެތައްކަމެއް އަންނަނީ ފެންމަތި ވަމުންނެވެ.

ޕީއެންސީ އަށް މެންބަރުން އިތުރުކުރުމަށް އެ ޕާޓީ އިން މަސައްކަތް ފެށީ ފާއިތުވި ރިޔާސީ އިންތިޚާބު ނިމުމާ އެކު އެވެ. ތަފާތު ކެމްޕޭންތައް އެކަމަށް ހިންގައިފި އެވެ. ސަރުކާރުގެ ސިޔާސީ މަގާމުގައި ތިބި މީސް މީހުންނަށް ވަކި ވަރަކަށް މެންބަރުން ހަމަކޮށްގެން ނޫނީ މަގާމުގައި ދެމި ނުތިބެވޭ ފަދަ ކެމްޕޭނެއް ވެސް ކުރިޔަށް ގޮސްފި ކަމަށް އަޑު އެރި އެވެ. އެ އަޑުތަކާއެކު ދެން ގަދަވެގެން އުޅެނީ މީސް މީހުންނަށް ނޭނގި އެ މީހުންގެ ނަން ޕީއެންސީގެ ދަފުތަރަށް ބަދަލުވެފައިވާ އަޑެވެ. އެތައް ބަޔަކު ގެންދަނީ އެ ޝަކުވާ ކުރަމުންނެވެ. އިލެކްޝަންސް ކޮމިޝަނަށް އެކަމުގެ މާބޮޑު ހައްލެއް ހޯދައިދެވޭ ކަމަކަށް ނުވެ އެވެ.

ސިޔާސީ ޕާޓީއެއްގައި މީހަކު ބައިވެރިވާނަމަ ފުރިހަމަކުރަންޖެހޭ ކަންތައްތަކެއް ހުރެ އެވެ. ފޯމެއް ފުރަން ޖެހެ އެވެ. އެ ފޯމުގައި ނަމާއި އެޑްރެހާއި ސޮއި އޮންނަން ޖެހެ އެވެ. ހަމަ އެފަދައިން އެ ފޯމުގައިވާ މައުލޫމާތުތަކަކީ ސައްހަ މައުލޫމާތުކަން ޔަގީންކުރުމަށްޓަކައި ހެކިންގެ ސޮއި ވެސް އޮންނަން ޖެހެ އެވެ. މި ހުރިހާ ޝަރުތުތަކަކީ ވެސް ރާއްޖޭގައި ހައްދުފަހަނަޅައިފައިވާ މަކަރާއި ހީލަތުގެ ވަބާއިން ސަލާމަތް ވުމަށްޓަކައި އިލެކްޝަންސް ކޮމިޝަންސް (އީސީ) އިން ހަމަޖައްސާފައިވާ ގަވާއިދުތަކެކެވެ.

ޕީއެންސީއަށް ސޮއިކުރި މީހުންގެ ފޯމްތައް އިހްސާން އެ ޕާޓީގެ ރަޖިސްޓްރާއާ ހަވާލުކުރަނީ: މީގެތެރޭގައި ވަގު ފޯމްތަކެއް ވެސް ހިމެނޭ --- ފޮޓޯ: ޕީއެންސީ

ގަވާއިދުތައް ހަދައިފައި ހުއްޓަސް އެގަވައިދުތައް ހަރުދަނާ ކަމުގައި ހީވިޔަސް އޭގެ ނަތީޖާ ރަނަގަޅަކަށް ނުދައްކަ އެވެ. ގަވާއިދާ ޚިލާފަށް ވަގަށް ޕާޓީތަކަށް މީހުން ވެއްދުން ހުއްޓޭ ކަމަކަށް ނުވެ އެވެ. ސިޔާސީ ޕާޓީތަކުން މެންބަރުން ގިނަ ކުރުމަށް އަބަދުވެސް މަސައްކަތް ކުރެ އެވެ.

އެ މަސައްކަތް އެގޮތަށް ކުރުމަށް ޕާޓީތަކަށް މަޖުބޫރުވާ ދެ ހާލަތެއް ކުރިމަތިވެ އެވެ. ފުރަތަމަ ކަމަކީ ޕާޓީ ޕާޓީއެއްގެ ގޮތުގައި ދެމިއޮތުމަށް ބޭނުންވާ އަދަދަށް މެންބަރުން ޕާޓީގައި ބޭތިއްބުމެވެ. ޕާޓީގެ މެންބަރު އެމީހުންނަށް ނޭނގި ޕާޓީ ބަދަލުވާ ގޮތަށް މަގުފަހިވެފައި އޮތުމުގެ ސަބަބުން ސިޔާސީ ޕާޓީތަކަށް އަބަދުވެސް އޮންނަނީ އިތުރު މެންބަރުން ހޯދަން ޖެހިފަ އެވެ. ދެވަނަ ހާލަތަކީ ދައުލަތުން ޕާޓީތަކަށް ދޭ ފައިސާ އެވެ. ކޮންމެ އަހަރަކުވެސް ސަރުކާގެ ބަޖެޓުގެ ވަކި މިންވަރެއް ސިޔާސީ ޕާޓީތަކުގެ ހިންގުމަށް ދޭން ޖެހެ އެވެ. އެކަމަކު އެ ފައިސާ ލިބެނީ ޕާޓީގައި މަދުވެގެން 10،000 މެންބަރުން ހަމަވެގެންނެވެ. އެއީ ވެސް ޕާޓީތަކަށް މެންބަރުން އިތުރު ކުރުމަށް މަސައްކަތް ޖުރަން ޖެހޭ މުހިންމު ބޭނުމެކެވެ.

ސިޔާސީ ޕާޓީ އަކީ ސިޔާސީ ގޮތުން އެއްވިސްނުމެއްގެ މައްޗަށް ބުރަވެވޭ ބަޔަކު އެބައި މީހުންގެ ސިޔާސީ ވިސްނުމާ އެއްގޮތަށް ސިޔާސީ ހަރަކާތްތައް ހިންގުމަށް ހެދިފައި ހުންނަ އެއްޗެކެވެ. މި އުސޫލުން ބަލާއިރު ކޮންމެ ޕާޓީއެއްގެ ވެސް މެންބަރުން ވާނީ ސިޔާސީގޮތުން އެއްމިސްރާބަކަށް ދާން ބޭނުންވާ ބަޔަކަށެވެ. އެހެންނަމަވެސް ރާއްޖޭގައި ކަންތައް ހަމަޖެހިފައިވާ ގޮތުން ޕާޓީތަކަށް ބޭނުންވަނީ އީސީގެ ދަފުތަރުގައި އެ ޕާޓީއެއްގެ މެންބަރުން އިތުރު ކުރުމެވެ. ލިބެން އޮތް އެއްޗެއް ލިބެން އޮތީ އެގޮތަށެވެ. އެހެންކަމުން ކޮންމެ ގޮތަކަށް ވެސް އީސީގައި އޮންނަ ޕާޓީ ދަފުތަރު ބޮޑުކުރުމަށް ޕާޓީތަކުން ކުރާ މަސައްކަތުގެ ނޭދެވޭ އަސަރު މިހާރު ވަނީ ވަރަށް ބޮޑުވެފަ އެވެ.

މައްސަލައިގެ ހައްލު

ސިޔާސީ ޕާޓީ ހެދުމާއި ޕާޓީ ހިންގުމަކީ މާބޮޑު ކަމަކަށް ހަދާކަށް ނުޖެހެ އެވެ. ޕާޓީތަކުގެ ދަފުތަރު އީސީއިން ބަލަހައްޓާކަށް ވެސް ނުޖެހެ އެވެ. އެކަން ސިޔާސީ ޕާޓީތަކަށް ދޫކޮށްލަންވީ އެވެ. ޕާޓީ އުފެއްދުމަށް ފުރިހަމަ ކުރަން ޖެހޭ އިޖުރާއަތެއް ފުރިހަމަ ކުރުމަށް ފަހު އުފަންވާ ޕާޓީތަކުގެ ދަފުތަރު ބެލެހެއްޓުމަކީ ޕާޓީގެ އަމިއްލަ ކަމަކަށް ދޫ ކޮށްލުމުން އިލެކްޝަންސް ކޮމިޝަނަށް އެތައް ބުރައަކުން ސަލާމަތްވުމުގެ އިތުރުން ބަޖެޓަށް ވެސް ބޮޑު ލުޔެއް ލިބޭނެ އެވެ.

ޕީއެންސީ އަށް މެންބަރުން އިތުރު ކުރުމަށް ހިންގާ ހަރަކާތް: ގިނަ ބައެއްގެ ނަމުގައި ވަގު ފޯމުތައް ހުށަހަޅާ ކަމުގެ ޝަކުވާ ގިނަ

ޕާޓީތަކަށް ސަރުކާރުގެ ބަޖެޓުން ދޭން ޖެހޭ ފައިސާ ބެހުމުގައި ބަލާނެ ހަމައަކީ އެ ޕާޓީ އަކަށް އިންތިޚާބުތަކުގައި ވޯޓު ލިބިފައިވާ ނިސްބަތެކެވެ. އެއީ ސާފު ކޮށް އެނގެން އޮންނަ ކަމެކެވެ. އިންތިޚާބެއްގައި ވާދަ ނުކުރާ ޕާޓީއަކަށް ސަރުކާރުގެ ބަޖެޓުން ފައިސާ ދޭކަށް ނުޖެހެ އެވެ.

ޕާޓީތަކުގެ ބޮޑު ކުޑަމިން ވަޒަންކުރެވޭނެ ދެ އިންތިޚާބެއް ރާއްޖޭގައި ބާއްވަ އެވެ. އެއީ ރައްޔިތުންގެ މަޖިލީހުގެ އިންތިޚާބާއި ކައުންސިލް އިންތިޚާބެވެ. މި ދެ އިންތިޚާބުގެ ހިސާބުތަކަކީ އީސީގައި ރައްކާކޮށް ބެލެހެއްޓޭ ހިސާބުތަކެކެވެ. އެހެންކަމުން އިތުރު ބޯ ހިމެނުމަކާނުލައި ޕާޓީތަކުގެ ސައިޒު ކަނޑައެޅޭނެ އެވެ.

އިންތިޚާބުގައި ވޯޓު ލިބުނު ނިސްބަތުން ޕާޓީތަކަށް ފައިސާ ދިނުމުން ހުރިހާ ގޮތަކުން ވެސް އިންސާފު ވެރިވީ އެވެ. ސިޔާސީ ޕާޓީތަކުގެ ދަފުތަރު ބެލެހެއްޓުމުގެ ޒިންމާ އީސީ އިން ދޫކޮށްލުމަކީ މިހާރު ދިމާވެފައިވާ ވަގަށް ޕާޓީ ބަދަލުކުރުމާ މެދު އޮތް ހައްލެވެ. އެކަމަށް ބޭނުންވާ ގާނޫނުތައް ހަދަންވީ އެވެ.