ރައީސް ޑރ. މުހައްމަދު މުއިއްޒުގެ ކެމްޕޭނަށް ހަރަދުކުރި މީހެއްގެ ކުންފުންޏަށް އައިޖީއެމްއެޗާއި ވިލިމާލެ ހޮސްޕިޓަލް އަދި ހުޅުމާލެ ހޮސްޕިޓަލްގެ ފޮޅާ ސާފުކުރުން އެތައް ގުނައެއް ބޮޑުކޮށް ހަވާލުކޮށްފި އެވެ.

އެ މަސައްކަތް ހަވާލުކޮށްފައި ވަނީ މޯލްޑިވްސް އެމްޕްލޯއިމަންޓް ސާވިސަސް ޕްރައިވެޓް ލިމިޓެޑާ އެވެ. އެ ކުންފުނީގެ ހިއްސާދާރުންނަކީ އަހްމަދު ޝިމްހާދު އާއި މުހައްމަދު ޝިމްހާދު އެވެ. އޭގެތެރެއިން މުހައްމަދު ޝިމްހާދަކީ ސޮލައިޓް ރެސްޓައުރެންޓްގެ ހިއްސާދާރެކެވެ.

ކުރީގެ ރައީސް އަބްދުﷲ ޔާމީނާއި ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި އައިޖީއެމްއެޗް ފޮޅާ ސާފުކުރުމުގެ ހިދުމަތް ފޯރުކޮށްދީފައި ވަނީ މަހަކު 80000 ރުފިޔާ އަށެވެ. ނަމަވެސް މޯލްޑިވްސް އެމްޕްލޯއިމަންޓް ސާވިސަސް ޕްރައިވެޓް ލިމިޓެޑަށް އައިޖީއެމްއެޗް ފޮޅާ ސާފުކުރުން ދީފައިވަނީ 412،000 ރުފިޔާއަށް ކަމަށް މި މައުލޫމާތު އެނގޭ މީހަކު "ހުރިހާ"އަށް ކަށަވަރުކޮށްދިނެވެ. މިއީ ކުރީގެ އަގަށް ވުރެ ފަސް ގުނަ ބޮޑު އަދަދެކެވެ.

އެ ކުންފުންޏަށް ހުޅުމާލެ ހޮސްޕިޓަލް ފޮޅާ ސާފުކުރުން ހަވާލުކޮށްފައިވަނީ ދެ ލައްކަ ރުފިޔާއަށްވުރެ ބޮޑު އަގެއްގަ އެވެ.

އެ މަސައްކަތުގެ އެގްރިމެންޓް ގާއިމްކުރިއިރު، ޓެންޑާ މައުލޫމާތުގައި ހިމެނި ގިނަ ކަންތައްތަކެއް ވަނީ އުނިކޮށްފަ އެވެ. އަދި ޓެންޑާ މައުލޫމާތުގައި ނެތް އެތަކެއް ފަސޭހަތަކެއް ވަނީ އެ ކުންފުންޏަށް ދީފަ އެވެ. އެގޮތުން އައިޖީއެމްއެޗް އިމާރާތުން ހަތަރު ތަނެއް ވަނީ އެއްވެސް ކުއްޔެއް ދައްކަންނުޖެހޭގޮތަށް އެ ކުންފުނީގެ އިދާރީ މަސައްކަތްތައް ކުރަން ދީފަ އެވެ.

މީގެ އިތުރުން ހުޅުމާލެ ހޮސްޕިޓަލުގެ ހުސް ބިމުގައި އެ ކުންފުނިން އަންނަނީ ދެ ބުރީގެ އިމާރާތެއް ވެސް ގާއިމްކުރަމުންނެވެ. މި ދެ ކަމަކީ ވެސް ޓެންޑާ މައުލޫމާތުގައި އޮތް ކަންތައްތަކެއް ނޫނެވެ.

މުހައްމަދު ޝިމްހާދަކީ ކާކު؟

މުހައްމަދު ޝިމްހާދު ވަނީ ނިމިދިޔަ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒުގެ ކެމްޕޭނަށް ހަރަދުކޮށްފަ އެވެ. އަދި މިދިޔަ މަޖިލިސް އިންތިހާބުގައި ޕީއެންސީއަށް އޭނާ ހަރަދުކޮށްފައިވެ އެވެ.

މުހައްމަދު ޝިމްހާދުގެ ހިއްސާ އޮންނަ އޯޓީޕީ ބައި ސޮލައިޓުން ވަނީ ރިޔާސީ އިންތިހާބާއި މަޖިލިސް އިންތިހާބުގެ ކެމްޕޭންގައި ޕީއެންސީގެ ކެމްޕޭން ޓީމްތަކަށް ހިލޭ ކެއުމުގެ ހިދުމަތް ހަމަޖައްސައިދީފަ އެވެ.

ސިނަމާލެ ބްރިޖް ޕްރޮޖެކްޓާއި ދަރުމަވަންތަ ހޮސްޕިޓަލުގެ ޕްރޮޖެކްޓް އަދި އެއާޕޯޓް ޕްރޮޖެކްޓަށް ގެނައި ހުރިހާ ބިދޭސީން ގެނައުމަށް ކޯޓާ ވިއްކީ ވެސް މުހައްމަދު ޝިމްހާދުގެ ހިއްސާ އޮންނަ ކުންފުންޏަކުންނެވެ.