ގާނޫނީ ހަނގުރާމައެއްގެ ތެރޭގައި އުޅެމުން އަންނަ ބްލޭކް ލައިވްލީއާއި ޖަސްޓިން ބެލްޑޯނީގެ ހަބަރުތަކަކީ މިހާރު ހޮލީވުޑްގެ އެންމެ ފަލަ ސުރުހީތަކުން ޖާގަ ހޯދާ ހަބަރުތަކެކެވެ.

އެ މައްސަލައިގައި އެންމެ ފަހުން އިވުނު އަޑަކީ ބްލޭކްގެ ހައްގުތައް ނިގުޅައިގަންނަން ޖަސްޓިންއާއި އޭނާގެ ގާނޫނީ ޓީމުން މަސައްކަތްކުރާ ކަަމަށް ބްލޭކްގެ ޓީމުން ތުހުމަތުކުރި އަޑެވެ.

ބްލޭކްގެ ވަކީލުން ބުނީ ޖަސްޓިންއާއި އޭނާގެ ވަކީލުންގެ ބޭނުމަކީ މިހާރު ކޯޓުގައި ހިނގަމުން އަންނަ ޖިންސީ ފުރައްސާރައިގެ މައްސަލާގައި ބްލޭކްގެ އަޑު ކަނޑުވާލާ އޭނާ "ވަޅުލުން" ކަމަށެވެ.

މި ބީދައިން ޖަސްޓިންއަށް ތުހުމަތު ކޮށްފައިވަނީ ގެއްލުމުގެ ބަދަލުގެ ގޮތުގައި 400 މިލިއަން ޑޮލަރު ހޯދުމަށް ބްލޭކް ހުށައެޅި މައްސަލަ އަނބުރާ ފޮނުވާލުމަށް ޖަސްޓިންގެ ޓީމުން ކޯޓުގައި އެދުމާއެކު ބްލޭކްގެ ވަކީލުން ނެރުނު ބަޔާނެއްގަ އެވެ.

އެ ބަޔާނުގައި އިތުރަށް ބުނެފައިވަނީ ޖަސްޓިންއާއި އޭނާގެ ޓީމުން ވަކާލާތު ކުރަނީ ޖިންސީ ފުރައްސާރައިގެ ގާނޫނުން އެންމެންނަށް ލިބިފައި އޮތް ހިމާޔަތް ނިގުޅައިގަތުމަށް ކަމަށެވެ.

"އިޓް އެންޑްސް ވިތު އަސް"ގައި އެކުގައި މަސައްކަތްކުރި ބްލޭކްއާއި ޖަސްޓިންގެ މައްސަލަ މިހާރު ވެފައިވަނީ ހޮލީވުޑްގެ "ހައި ޕްރޮފައިލް" ކޭސް އަކަށެވެ.