ދެހާސް ސޯޅަ ވަނަ އަހަރުގެ ތެރޭގައި ކުޑަ އަންހެން ކުއްޖަކަށް ޖިންސީ ގޯނާ ކުރި މައްސަލައާ ގުޅިގެން މަޝްހޫރު ފިލްމީތަރި މުހައްމަދު ޖުމައްޔިލް ނިމާލްގެ މައްޗަށް ދައުވާ އުފުލައިފި އެވެ.

ޕީޖީ އޮފީހުގެ އޮފިޝަލަކު ވިދާޅުވީ ޖުމައްޔިލްގެ މައްޗަށް ކުރީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ތިން ވަނަ މާއްދާގެ (ހ) އާ ހަވާލާދީ، އެ މާއްދާގެ (ނ) ގެ ދަށުން، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްތުގައި އަތްލުމުގެ ދައުވާ އެވެ.

އެ ދައުވާ ސާބިތުވެއްޖެނަމަ 10 އަހަރާއި 14 އަހަރާ ދެމެދުގެ ޖަލު ހުކުމެއް އޭނާގެ މައްޗަށް އަންނާނެ އެވެ.

އެ މައްސަލަ އަކީ ކުރީގެ ޕްރޮސިކިއުޓާ ޖެނެރަލް އައިޝަތު ބިޝާމް ހެކި ނެތް ކަމަށް ބުނެ ދައުވާ ނުކޮށް ފައިލް ކޮށްފައިވާ މައްސަލައެކެވެ. ނަމަވެސް އެ މައްސަލާގައި ހުރި ހެކިތަކާ އެކު އަނިޔާ ލިބުނު ކުއްޖާ ސޯޝަލް މީޑިއާ އާއި މީޑީއާގައި އެކަމާ ގުޅިގެން ކަންބޮޑުވުންފާޅު ކުރުމުން އެ މައްސަލަ ރިވިއުކުރަން މިހާރުގެ ޕީޖީ ހުސައިން ޝަމީމް ނިންމެވި އެވެ.