މިދިޔަ އަހަރުގެ ޑިސެމްބަރު މަހުގެ 11 އިން މި އަހަރުގެ ޖެނުއަރީ މަހުގެ 13 އަށް ކުރިއަށްދިޔަ ރެންޑަމް ސެލެކްޝަން ޑްރޯ ޓިކެޓް ވިއްކުމުގެ މަރުހަލާގައި، 500 މިލިއަނަށް ވުރެ ގިނަ ޓިކެޓް ރިކުއެސްޓް ހުށަހަޅާފައިވާކަމަށް ދުނިޔޭގެ ފުޓުބޯޅައިގެ މައި އިދާރާ ފީފާއިން ބުނެފި އެވެ.

ފީފާއިން ބުނީ މިއީ މި އަހަރު ބާއްވާ ވޯލްޑް ކަޕް މުބާރާތުގެ ފޯރި ހުރި މިންވަރު އިތުރަށް ދައްކުވައިދިން ކަމެއް ކަމަށާއި މިއީ މީގެ ކުރިން ބޭއްވުނު އެއްވެސް ވޯލްޑް ކަޕް މުބާރާތެއްގައި ފެނިގެން ގޮސްފައިވާނުވާ ފަދަ ފޯރިއެއް ކަމަށެވެ.

"މިފަހަރު މިއީ ތަފާތު ފެނިގެންދާ ވޯލްޑް ކަޕެއް. ރެންޑަމް ސެލެކްޝަން ޑްރޯ ޓިކެޓް ވިއްކުމުގެ މަރުހަލާގައި، 500 މިލިއަނަށް ވުރެ ގިނަ ޓިކެޓް ރިކުއެސްޓް ހުށަހަޅާފައިވުމަކީ ރެކޯޑެއް. މިއީ މީގެން ދުވަހަކު ވެސް މުބާރާތެއްގައި ފެނިގެން ދިޔަ ކަމެއް ނޫން." ފީފާއިން ބުނެފައިވެ އެވެ.

ފީފާއިން ބުނީ ކޮންމެ އެޕްލިކޭޝަނެއްވެސް ވަކި ކްރެޑިޓް ކާޑު މައުލޫމާތު ހިމަނައިގެން ކަށަވަރުކޮށްފައިވާއިރު، 33 ދުވަހުގެ މުއްދަތުގައި ދުވާލަކު އެވްރެޖްކޮށް 15 މިލިއަން ޓިކެޓް ރިކުއެސްޓް ހުށަހަޅާފައިވާ ކަމަށެވެ. މިއީ ދުނިޔޭގެ ކުޅިވަރުގެ ތާރީހުގައި މުޅިން އާ ރެކޯޑެއް ކަމަށް ފީފާއިން ބުނެ އެވެ. ފީފާގެ 211 މެންބަރު އެސޯސިއޭޝަންތައް ނިސްބަތްވާ ހުރިހާ ގައުމުތަކަކުންނާއި ސަރަހައްދުތަކުން އެޕްލިކޭޝަންތައް ލިބިފައިވާއިރު، މިއީ 48 ޓީމާއެކު ބާއްވާ ފުރަތަމަ ވޯލްޑް ކަޕަށް މުޅި ދުނިޔޭގެ ސަމާލުކަން ހުއްޓިފައިވާ މިންވަރު ހާމަކޮށްދޭ ކަމެއް ކަމަށް ފީފާއިން ބުނެ އެވެ.

މުބާރާތް ބާއްވާ ގައުމުތައް ކަމަށްވާ އެމެރިކާ، މެކްސިކޯ އަދި ކެނެޑާ ފިޔަވައި، އެންމެ ގިނަ އެޕްލިކޭޝަން ހުށަހަޅާފައިވަނީ ޖަރުމަނުވިލާތް، އިންގްލެންޑް، ބްރެޒިލް، ސްޕެއިން، ޕޯޗުގަލް، އާޖެންޓީނާ އަދި ކޮލަމްބިއާގެ ސަޕޯޓަރުންނެވެ. މި މަރުހަލާގައި އެންމެ ގިނަ ބަޔަކު ބަލަން ބޭނުންވި މެޗަކީ ޖޫން 27 ވާ ހޮނިހިރު ދުވަހު މިއާމީގައި ކުޅޭ ކޮލަމްބިއާ އާއި ޕޯޗުގަލް ބައްދަލުކުރާ މެޗެވެ. އެންމެ ގިނަ ރިކުއެސްޓް ލިބުނު ގަދަ 5 މެޗުގެ ތެރޭގައި ދެން ހިމެނެނީ ޖޫން 18 ވާ ބުރާސްފަތި ދުވަހު ގުއަޑަލަހާރާގައި ކުޅޭ މެކްސިކޯ އާއި ދެކުނު ކޮރެއާ ބައްދަލުކުރާ މެޗާއި ޖުލައި 19 ވާ އާދީއްތަ ދުވަހު ނިއު ޔޯކް ނިއު ޖާޒީގައި ކުޅޭ ފައިނަލް މެޗާއި ޖޫން 11 ވާ ބުރާސްފަތި ދުވަހު މެކްސިކޯ ސިޓީގައި މެކްސިކޯ އާއި ދެކުނު އެފްރިކާ ބައްދަލުކުރާ މުބާރާތް ހުޅުވާ މެޗާއި އަދި ޖުލައި 2 ވާ ބުރާސްފަތި ދުވަހު ޓޮރޮންޓޯގައި ކުޅޭ ގަދަ 32 ގެ މެޗުތަކެވެ. މިއީ ބޮޑެތި މެޗުތަކަށާއި ނޮކްއައުޓް ސްޓޭޖުގެ މެޗުތަކަށް ތިން ގައުމުގައި ވެސް އޮތް ބޮޑު ތަރުހީބު ހާމަވާ ކަމެއް ކަމަށް ފީފާއިން ބުނެ އެވެ.

"މަހަކަށްވުރެ ކުޑަ ދުވަސްކޮޅެއްގެ ތެރޭގައި 500 މިލިއަނަށް ވުރެ ގިނަ ޓިކެޓް ރިކުއެސްޓް ލިބުމަކީ ހަމައެކަނި ޑިމާންޑެއް ނޫން، އެއީ މުޅި ދުނިޔެއިން ދިން މެސެޖެއް. ފީފާގެ ނަމުގައި، ހުރިހާ ސަރަހައްދެއްގެ ފުޓްބޯޅަ ސަޕޯޓަރުން މި ދެއްވި ފުރިހަމަ އިޖާބައަށްޓަކައި ޝުކުރު އަދާކޮށް މަރުހަބާ ކިޔަން،" ފީފާގެ ރައީސް ޖިއާނީ އިންފަންޓީނޯ ވިދާޅުވި އެވެ.

ރެންޑަމް ސިލެކްޝަން ޑްރޯއަށް އެޕްލައި ކުރުމުގެ މުއްދަތު ހަމަވުމާ ގުޅިގެން، ޓިކެޓްތައް ރިކުއެސްޓް ކުރި ފަރާތްތަކާއި ހަވާލުކުރުމުގެ ކުރިން އެއީ ސައްޚަ ރިކުއެސްޓްތަކެއްތޯ އަދި އެ ރިކުއެސްޓްތަކުގެ ޝަރުތުތަކާއި ހައުސްހޯލްޑް ލިމިޓްތަކަށް ފެތޭ އެޕްލިކޭޝަންތަކެއްތޯ ފީފާ އިން ކަށަވަރުކުރާނެއެވެ. މި މަރުހަލާ ނިމުމުން، ލިބެން ހުރި ޓިކެޓަށްވުރެ ޑިމާންޑް ބޮޑުވާ ހާލަތްތަކުގައި، ހުރިހާ އެޕްލިކަންޓުންނަށް އިންސާފުވެރި އަދި ހަމަހަމަ ފުރުސަތެއް ދިނުމުގެ ގޮތުން ޓިކެޓްތައް ހަވާލުކުރާނީ ރެންޑަމް ސެލެކްޝަން (ގުރުއަތުލުމުގެ) މަރުހަލާއެއްގެ ތެރެއިން ކަމަށް ފީފާއިން ބުނެ އެވެ.

ޓިކެޓް އެޕްލިކޭޝަންތަކުގެ ނަތީޖާ ފެބްރުއަރީ 5 ގެ ކުރިން އީމެއިލް މެދުވެރިކޮށް ސަޕޯޓަރުންނަށް އަންގާނެ ކަމަށާއި ޓިކެޓް ކާމިޔާބުވި ފަރާތްތަކަށް އީމެއިލް މެދުވެރިކޮށް އެކަން އެންގުމަށްފަހު، ޓިކެޓްގެ ފައިސާ އޮޓޮމެޓިކުން ކަނޑާނެ ކަމަށް ވެސް ފީފާއިން ބުނެ އެވެ.

ފީފާއިން އިތުރަށް ބުނީ ވޯލްޑް ކަޕުން ޓިކެޓް ވިއްކައިގެން ލިބޭ ފައިސާ ނުވަތަ އާމްދަނީ އިންވެސްޓްކުރަނީ ފީފާގެ 211 މެންބަރު އެސޯސިއޭޝަންތަކުގައި ފިރިހެން، އަންހެން އަދި ޒުވާން ފުޓްބޯޅަ ކުރިއެރުވުމަށެވެ.