ކުރީގެ ރައީސް މުހައްމަދު އަމީން ދީދީގެ ވެރިކަމުގައި ދިވެހި ފައިސާގެ ނޫޓްތައް ކުރެއްސެވުމުގެ ޝަރަފު ލިބިވަޑައިގެންފައިވާ ސަރުދާރު ދޮންމަނިކު (ސަރުދާރު ދޮންބެ) އަވަހާރަވެއްޖެ އެވެ.

ސަރުދާރު ދޮންބެ އަވަހާރަވީ ރޭ ފަތިހު އޭޑީކޭ ހޮސްޕިޓަލުގައި ފަރުވާން ދެމުންދަނިކޮށެވެ. އޭނާ އަވަހާރަވިއިރު އުމުރުފުޅަކީ 93 އަހަރު އެވެ.

މިދިޔަ އަހަރު މެއި މަހު، ސަރުދާރު ދޮންބެ ވަނީ ކޮވިޑް-19 އަށް ޕޮޒިޓިވްވެފައިވެ އެވެ. އޭގެ ދެ މަސް ފަހުން ކޮވިޑް-19 އިން ޝިފާ ލިބުނުއިރު، ސަރުދާރު ދޮންބެ ފާހަގަ ވެގެން ދިޔައީ ކޮވިޑް-19 އިން ރަނގަޅުވި އެންމެ ދުވަސްވީ މީހުންގެ ތެރޭގަ އެވެ،

އުމުރުން 25 އަހަރުން ފެށިގެން ކުރުހުމުގެ މަސައްކަތް ކުރައްވަން ފެއްޓެވި ސަރުދާރު ދޮންބެ އަކީ ދައުލަތުގެ ނިޝާން ކުރެއްސެވުމުގައި ވެސް ހިއްސާވެ ވަޑައިގެންނެވި ބޭފުޅެކެވެ. އަދި 1996 ވަނަ އަހަރު ކުރެހުމުގެ ރޮނގުން ޢާއްމު ޚިދުމަތުގެ ޝަރަފުވެރިކަމުގެ އިނާމު ސަރުދާރު ދޮންބެ އަށް ލިބިވަޑައިގެންފައިވެ އެވެ. ކުރުހުމުގެ އިތުރުން އޭނާ އަކީ އަތްތެރި މަސައްކަތުގައި ވެސް ފުންނާބު އުސް ބޭފުޅެކެވެ. ޢަދި ސަރުދާރު ދޮންބެއަކީ މަޝްހޫރު ޑައިވަރެކެވެ. އޭގެ އިތުރުން ސްޓެންސިލުން ލިޔެގެން ނޫސް، މަޖައްލާ ނެރުނު ޒަމާނުގައި ނޫސްތަކެއް އިލަސްޓްރޭޓަރެއްގެ ގޮތުން ދޮންބެ އެހީތެރިކަން ފޯރުކޮށްދީފައިވެ އެވެ.