މާލޭގެ އެކި ސަރަހައްދުތަކުގައި ހުރި ގުދަންތަކާއި ގަރާޖުތަކާއި ވޯކްޝޮޕްތައް އިންޑަސްޓްރިއަލް ޒޯނަށް ބަދަލު ކުރަން މާލެ ސިޓީ ކައުންސިލުން ނިންމައިފި އެވެ.

އެކަން ހާމަކުރުމުގެ ގޮތުން ރޭ މާލޭ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މޭޔަރު ޑރ. މުހައްމަދު މުއިއްޒު ވިދާޅުވީ މީހުން ދިރިއުޅޭ ސަރަހައްދުތަކުގައި ގުދަންތަކާއި ގަރާޖުތަކާއި ވޯކްޝޮޕްތައް ހިންގުމުގެ ސަބަބުން ރައްޔިތުންނަށް ވަރަށް ބޮޑަށް އުނދަގޫވާ ކަމަށެވެ. އަދި އެކަމުގެ ސަބަބުން މާލޭގައި ޓްރެފިކް މައްސަލަތައްވެސް އިންތިހާއަށް ބޮޑުވެފައިވާ ކަމަށެވެ.

ޑރ. މުއިއްޒު ވިދާޅުވީ، އެކަންކަން ހައްލުވާން އޮތީ މިފަދަ ތަންތަނަށް ހާއްސަކޮށް ހިއްކިފައިވާ ބިން، އިންޑަސްޓްރިއަލް ވިލެޖަށް އެ ތަންތަން ބަދަލު ކުރެވިގެން ކަމަށެވެ.

"އަޅުގަނޑުމެން ކައުންސިލުން މިއަދު މި ނިންމީ އިންޑަސްޓްރިއަލް ވިލެޖަށް މާލެ ސިޓީ ތެރޭގައި ހުރި ގަރާޖުތަކާއި ގުދަންތަކާއި ވޯކް ޝޮޕްތައް ބަދަލު ކުރަން، ކުރަަންޖެހޭ ހުރިހާ މަސައްކަތެއް ކުރުމަށް،" މުއިއްޒު ވިދާޅުވި އެވެ.

މާލެ ހިތްފަސޭހަ ތަނަކަށް ހެދުމަކީ ކޮންމެ ރައްޔިތަކުވެސް ބޭނުންވާ ކަމެއް ކަމަށާއި މާލެ ހިތްފަސޭހަ ތަނަކަށް ހެދޭނީ ގަރާޖު ތަކާއި ގުދަންތަށް އެކަމަށް ހާއްސަކޮށްފައިވާ ބިމަށް ބަދަލުކޮށްގެން ކަމަށް ޑރ. މުއިއްޒު ވަނީ ވިދާޅުވެފަ އެވެ.

އޭނާ އިތުރަށް ވިދާޅުވީ އިންޑަސްޓްރިއަލް ވިލެޖުގެ ޕްލޭނެއް ހަދައި ކަމާބެހޭ ވުޒާރާތަކާތަކާއެކު މަޝްވަރާކޮށްގެން އެތަން ތަރައްގީކުރާނެ ބަޔަކު ހޯދައި ހަވާލުކުރަންވެސް މިއަދުގެ ބައްދަލުވުމުގައި ނިންމާފައިވާ ކަމަށެވެ. އެކަންކަން ނިންމާފައިވަނީ މެމްބަރުންގެ އިއްތިފާގުންނެވެ.