ތަމަޅަ ޑައިރެކްޓަރު އެޓްލީ ކުމާރާއެކު ބޮލީވުޑްގެ އެކްޓަރު ޝާހްރުކް ހާން މަސައްކަތްކުރަމުން އަންނަ ފިލްމުގެ ނަމަކީ "ލަޔަން" ކަމަށް މީޑިއާ ރިޕޯޓްތައް ބުނެފި އެވެ.

މިހާރު ސޯޝަލް މީޑިއާގައި ދައުރުވަމުން އަންނަ ސިޓީއެއްގައިވާ ގޮތުން ބޮލީވުޑްގެ މަޝްހޫރު އެކްޓަރު ޝާހްރުކް ހާން އަދި ތަމަޅަ ޑައިރެކްޓަރު އެޓްލީ އާއެކު މިހާރު ކުރަމުން އަންނަ ފިލްމުގެ ނަމަކީ "ލަޔަން" ކަމަށެވެ.

އެ ސިޓީ އަކީ ޕޫނޭގެ ސަންޓް ތުކުރާމް ނަގަރު މެޓްރޯ ސްޓޭޝަނުގައި ފިލްމުގެ މަންޒަރުތަކެއް މިދިޔަ މަހުގެ 27 އިން މި މަހުގެ 7 އަށް ނެގި އިރު، ކާސްޓާއި ކްރޫގެ ވެހިކަލްތައް ޕާކްކުރާނެ ޖާގަ ހޯދުމަށް، ފިލްމު ޕްރޮޑިއުސްކުރާ ސަން ޑޭ ފިލްމްސް އިން ރޭލު ސްޓޭޝަން އޮޕަރޭޓްކުރާ އިދާރާ އަށް ފޮނުވި ސިޓީއެކެވެ. އެ ސިޓީގައި، ޝާހްރުކާއި ދެކުނުގެ ބަތަލާ ނަޔަންތަރާ ލީޑް ރޯލު ކުޅޭ ފިލްމުގެ ނަމަކީ "ލަޔަން" ކަމަށް ބުނެފައިވެ އެވެ.

ޝާހްރުކާއި އެޓްލީގެ ފިލްމުގެ ވާހަކަ 2019 އިން ފެށިގެން މީޑިއާތަކުގައި ދެކެވެމުން ދިޔަ ނަމަވެސް މި ޕްރޮޖެކްޓާ ބެހޭ އެއްވެސް ވާހަކައެއް މިހާތަނަށް ރަސްމީކޮށް ދައްކައިފައެއް ނުވެ އެވެ. "ލަޔަން" އަކީ ސަން ޑޭ ފިލްމްސް އާއި ޝާހްރުކްގެ ރެޑް ޗިލީޒް ގުޅިގެން ހަދާ ފިލްމެކެވެ.

"ލަޔަން" ގެ މަސައްކަތް ޝާހްރުކް ފެށި އިރު، ޑައިރެކްޓަރު ސިދާތު އާނަންދުގެ "ޕަތާން" ގެ މަސައްކަތް ވެސް އޭނާ އަންނަނީ މިދިޔަ އަހަރުން ފެށިގެން ކުރަމުންނެވެ. "ޕަތާން" ގެ ކާސްޓްގައި ދީޕިކާ ޕަދްކޯނާއި ޖޯން އަބްރަހަމް ވެސް ހިމެނެ އެވެ.

ޝާހްރުކްގެ އެންމެ ފަހުގެ ފިލްމަކީ 2018 ގެ "ޒީރޯ" އެވެ.