އާންމު ރައްޔިތުންނާއި ސަރުކާރާ ދެމެދު މިހާރަށްވުރެ ލުއިފަސޭހަ ގޮތެއްގައި މުއާސަލާތު ކުރެވޭނެ ގޮތެއް ހަމަޖެއްސުމަށްޓަކައި، ނޭޝަނަލް ސެންޓަ ފޮ އިންފޮމޭޝަން ޓެކްނޯލޮޖީން ގާއިމުކުރައްވައިފައިވާ، އޮންލައިން ޕްލެޓްފޯމް "ޖީއޯވީޑޮޓްއެމްވީ" މެސެޖުގެ ހިދުމަތް ބޭނުންކޮށްގެން ސަރުކާރުގެ އިދާރާތަކަށް ކަންކަން ހުށަހެޅުމުގެ ފުރުސަތު އާންމު ރައްޔިތުންނަށް ހުޅުވާލައިފި އެވެ.

މިއަދު ރައީސް އޮފީހުން ނެރުއްވާފައިވާ ދެންނެވުމުގައި ބުނެފައި ވަނީ ރައީސް އިބްރާހިމް މުހައްމަދު ސޯލިހުގެ އިރުޝާދުގެ ދަށުން މި ގޮތަށް ހަމަޖެއްސެވުމުން، އަމިއްލަ މީހުން ސަރުކާރުގެ އިދާރާތަކަށް "ޖީއޯވީޑޮޓްއެމްވީ" މެސެޖުގެ ޒަރީއާއިންނާއި، ސިޓީން ހުށަހަޅާ ކަންކަމަށް ޖަވާބު ދެއްވުމުގައި ސަރުކާރުގެ އިދާރާތަކުން އަމަލުކުރަންވާނެގޮތް ތަފްޞީލްކޮށްދެއްވާފައިވެ އެވެ. އަދި މި ޚިދުމަތް ފެށުމާއެކު، މި ޚިދުމަތް ބޭނުންކޮށްގެން ސަރުކާރުގެ އިދާރާތަކަށް ކަންކަން ހުށަހެޅުމަށް އަމިއްލަ ފަރާތްތަކަށް ބާރުއެޅުއްވައިދެއްވުމަށް ރައީސް އެދިވަޑައިގެންފައިވާ ކަމަށް ރައީސް އޮފީހުން ބުނެ އެވެ.

މިއަދު އާންމުކޮށް ހުޅުވައިލެއްވި "ޖީއޯވީޑޮޓްއެމްވީ"ގެ ހިދުމަތް ފެށުމާ ހަމައަށް ސަރުކާރުގެ އިދާރާތަކަށް އަމިއްލަ މީހުންގެ ފަރާތުން ލިބިފައިވާ ސިޓީތަކާއި އީމެއިލްތަކާމެދުގައި އަމަލުކުރާނީ މިހާތަނަށް އަމަލުކުރައްވަމުން ގެންދެވި ގޮތަށް ކަމަށް ވެސް އެ ދެންނެވުމުގައިވެ އެވެ.

މީގެ އިތުރުން ރައީސް އޮފީހުން ބުނީ އެއޮފީހުން މީގެ ކުރިން އާއްމުކޮށްފައިވާ މި އޮފީހުގެ ނަންބަރު 63/1975 (14 އޮކްޓޫބަރު 1975) ދެންނެވުމާއި، 59/1991 (15 ޖޫން 1991) ދެންނެވުމާއި، 68/1995 (7 އޮކްޓޫބަރު 1995) ދެންނެވުމާއި، 77/2001 (25 ޑިސެންބަރު 2001) ދެންނެވުން ބާތިލުކުރެވިފައިވާ ކަމަށެވެ.