ފިލްމީތަރި އަދި މަޝްހޫރު މޮޑެލް ހުނޭސާ އާދަމް ނަސީރު (ހުނޫ)އަށް ފުލުހުން ފުރައްސާރަ ކުރާ ކަމަށް އޭނާ ބުނެފި އެވެ.

ހުނޫގެ ފަރާތުން މިހެން ބުނެފައި ވަނީ އޭނާގެ ބަންދާމެދު ގޮތެއް ނިންމަން އިއްޔެ ބޭއްވި މަޖިލީހުގައެވެ. އޭނާގެ ބަންދަށް އިއްޔެ އިތުރުކުރީ 15 ދުވަހެވެ.

އޭނާގެ ފަރާތުން ކޯޓުގައި ބުނެފައި ވަނީ އޭނާ ބަންދުގައި ހުންނަ އިރު އޭނާއަށް ފުރައްސާރަ ކުރާ ކަމަށެވެ. އަދި އޭނާ ބަލިވެގެން ފަރުވާއަށް އެދުމުން އެކަށީގެންވާ ގޮތެއްގައި ބޭސް ފަރުވާ ނުދޭ ކަމަށް ވެސް ބުނެފައިވެއެވެ.

މިކަމާ ގުޅިގެން ފުލުހުން ވަކިއެއްޗެއް ބުނެފައެއް ނުވެ އެވެ.

ހުނޫ އާއި އޭނާގެ ލޯބިވެރިޔާ ހައްޔަރުކުރީ މިދިޔަ މާޗް މަހުގެ 28 ވަނަ ދުވަހު މަސްތުވާތަކެއްޗާއެކު އެވެ.

އެނގިފައިވާ ގޮތުގައި ދައުލަތުން އޭނާގެ މައްޗަށް އުފުލާފައި ވަނީ ޑައިމޯފިން ޓްރެފިކް ކުރުމުގެ ދައުވާ އާއި ކެނަބިސް ޓްރެފިކް ކުރުމުގެ ދައުވާގެ އިތުރުން މަސްތުވާތަކެއްޗާ ބެހޭ ގާނޫނުގެ ޖަދުވަލު އެކެއްގައިވާ މަސްތުވާއެއްޗެއް ޓްރެފިކްކުރުމުގެ ދައުވާ އެވެ.

އެ މައްސަލާގައި އޭނާގެ ލޯބިވެރިޔާގެ މައްޗަށް ވެސް ވަނީ ދައުވާ އުފުލާފަ އެވެ.

ހުނޫއަކީ އިންސްޓްގްރާމްގަ އާއި ޓިކްޓޮކްގައި ވެސް މަޝްހޫރުކަން ހޯދާފައިވާ މީހެކެވެ. އިންސްޓަގްރާމްގައި އެކަނި އޭނާގެ 25،000 އަށް ވުރެ ގިނަ ފޮލޯވަރުން ތިބެ އެވެ.

ޑާކްރެއިންގެ ގިނަ ފިލްމުތަކުން ފެނިފައިވާ ހުނޫ ހައްޔަރުކުރިއިރު ވެސް އޭނާ ދިޔައީ ބައެއް ފިލްމުތަކުގެ މަސައްކަތް ކުރަމުންނެވެ.

ހުނޫއަކީ ކުޑަދުވަސްކޮޅެއްގެ ތެރޭގައި ފިލްމީ ދާއިރާގައި ގިނަ ބައެއްގެ މަގުބޫލުކަން ހޯދަމުން އައި ފަންނާނެކެވެ.

ޓިކްޓޮކް އާއި ފިލްމީ ދާއިރާގައި މަޝްހޫރު ރާއްޖޭގެ ހަތަރު ވަރަކަށް ފަންނާނުންގެ މައްޗަށް މިހާރު ވެސް ކްރިމިނަލް ކޯޓުގައި މަސްތުވާތަކެތީގެ ދައުވާތައް ވަކިވަކިން އުފުލާފައިވެ އެވެ. އޭގެ ތެރެއިން ބައެއް ފަންނާނުންގެ ދައުވާތަކުގެ ޝަރީއަތް މިހާރު އޮތީ އެންމެ ފަހުގެ މަރުހަލާގަ އެވެ.