ގދ. ތިނަދޫ، ސިޓީއަކަށް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރައީސް ސޯލިހު މިހެން ވިދާޅުވީ އެމްޑީޕީ ޕްރައިމަރީ ކެމްޕެއިންގައި ގދ. ތިނަދުއަށް ވަޑައިގެން ދެއްކެވި ވާހަކަފުޅުގަ އެވެ.

ރައީސް ސޯލިހު ވިދާޅުވީ ތިނަދުއަށް ސިޓީއެއްގެ ދަރަޖަ ދެއްވާނެ ކަމަށާއި ކަމަށާއި ތިނަދޫ ސިޓީއަކަށް ހެދުމުގެ ރަސްމިއްޔާތައް ވަރަށް އަވަހަށް ވަޑައިގަންނަވާނެ ކަމުގަ އެވެ.

ރައީސް ސޯލިހު ވިދާޅުވީ މި ސަރުކާރުގެ ތަރައްގީގެ ސިޔާސަތުަގައި ތިނަދޫއަކީ ވަރަށް މުހިންމު ރަށެއް ކަމުގަ އެވެ. އަދި ތިނަދޫ ތަރައްގީ ކުރައްވަމުން ގެންދަވަނީ ސިޓީއަކަށް ބަދަލު ކުރުމަށް ކަމަށެވެ.

ރައީސް ސޯލިހު ގދ. ތިނަދުއަށް މިއަދު ވަޑައިގެން ސަޕޯޓަރުންނާ ބައްދަލުކުރައްވަނީ.

"ސިޓީއަކަށް ބޭނުންވާ ހުރިހާ ވަސީލަތްތަކެއް އިރާދަކުރެއްވިއްޔާ އެ ވިސްނުމާއި އެއްގޮތަށް މިހާރު މިގެންދަނީ ކުރިއަށް،" ރައީސް ސޯލިހު ވިދާޅުވި އެވެ.

ތިނަދޫގައި ބައިނަލްއަގުވާމީ ކޮމާޝަލް ޕޯޓެއް ތަރައްގީ ކޮށްދެއްވާނެ ކަމަށާއި މިހާރު ވެސް އެ މަސައްކަތް ފަށާފައިވާ ކަމަށް ރައީސް ވިދާޅުވި އެވެ.

މީގެ އިތުރުން ތިނަދޫ ކައިރީގައި ބައިނަލްއަގުވާމީ ވައިގެ ބަނދަރެއް ގާއިމް ކުރައްވާނެ ކަމަށާއި ޓާޝަރީ ހޮސްޕިޓަލުގެ މަސައްކަތް ވަރަށް އަވަހަށް ފަށްޓަވާނެ ކަމަށް ވެސް އެމަނިކުފާނު ވިދާޅުވި އެވެ.

ރައީސް ސޯލިހު ވިދާޅުވީ ރާއްޖޭގެ އެންމެ މައި ދެ ސިނާއަތްކަމަށްވާ ފަތުރުވެރިކަމާއި މަސްވެރިކަމުގައި ވެސް ހުވަދު އަތޮޅަކީ އެންމެ ކުރިއަރާފައިވާ އަތޮޅު ކަމަށެވެ.

"އޭގެ ތެރެއިން ތިނަދޫއަކީ މުހިންމު ރަށެއް،" ރައީސް ސޯލިހު ވިދާޅުވި އެވެ.