ބިޒްނަސް ސެންޓާ ކޯޕަރޭޝަނުންދޭ ހުރިހާ ޚިދުމަތްތަކެއް ޑިޖިޓަލައިޒްކޮށް އެއް މަންސައަކުން ފޯރުކޮށްދިނުމަށް ހާއްސަ "ކުމެވި ޕޯޓަލް"ގެ ނަމުގައި އިފުތިތާހުކޮށްފި އެވެ.

މި މަހުގެ 10 ވަނަ ދުވަހު ބީސީސީގައި ބޭއްވުނު ރަސްމިއްޔާތެއްގައި ކުމެވި ޕޯޓަލް އިފުތިތާޙުކުރީ އިރު، މި ޕޯޓަލް އިފުތިތާޙުކޮށްފައިވަނީ ބީސީސީގެ ފޭސްބުކް ޕޭޖު މެދުވެރިކޮށް ސުމޭކުކޮށެވެ.

ބީސީސީން ބުނީ މި ޕޯޓަލްގެ މަޤުސަދަކީ ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުން ކަމަށެވެ.

ޔޫއެންޑީޕީ އާއި ޖަޕާން ސަރުކާރުގެ އެހީތެރިކަމާ އެކު އިފުތިތާހުކުރި މި ޕޯޓަލް މެދުވެރިކޮށް ބީސީސީގެ ގިނަ ހިދުމަތްތަކެއް ލިބޭނެ ކަމަށް ބީސީސީން ބުނެ އެވެ. އެގޮތުން ބީސީސީން ދެމުން އަންނަ ޚިދުމަތްތައް ކަމަށްވާ އޮތެންޓިކް މޯލްޑިވްސް، ސީޑް ބައި ބީސީސީ، ވިޔަފާރި ކޮންސަލްޓެންސީގެ ޚިދުމަތް، މަހަ ޕޯޓަލް، އަދި ކްރިއޭޓިވް އިކޮނޮމީ ފަންޑާއި އަމިއްލަ މަސައްކަތް ކުރައްވާ ފަރާތްތަކުގެ ދަފުތަރުގައި ހިމެނުމުގެ ފުރުޞަތު ވެސް މި ޕޯޓަލް މެދުވެރިކޮށް ލިބޭނެ އެވެ.

ކުމެވި ޕޯޓަލުން ލިބޭ ޚިދުމަތްތަކުގެ ތެރޭގައި ހިމެނެނީ:

  • އޮތެންޓިކް މޯލްޑިވްސްގެ ސަޕްލަޔަރަކަށް ވާން އެދޭ ފަރާތްތަކަށް އެ ކަމަށް އެދި ހުށަހެޅުމުގެ ޚިދުމަތް
  • ސީޑް ބައި ބީސީސީންދޭ ޚިދުމަތްތައް ކަމަށްވާ މަސައްކަތު ޖާގަތައް ހޯދުމަށް އެދި ހުށަހެޅުމުގެ ޚިދުމަތް
  • ވިޔަފާރިއެއް ފަށަން ނުވަތަ ވިޔަފާރިއާ ބެހޭ ކަންކަމުގައި ތަޖުރިބާކާރުންގެ ޚިޔާލާއި މަޝްވަރާ ހޯދުމުގެ ޚިދުމަތް
  • ކޮންސަލްޓެންސީގެ ޚިދުމަތަށް އެދި ހުށަހެޅުމުގެ ފުރުސަތުމަސްވެރި އުފެއްދުންތައް ވިއްކުމަށް ޚާއްޞަ މަހަ ޕޯޓަލްގެ ޚިދުމަތް
  • އަމިއްލަ މަސައްކަތްކުރައްވާ ފަރާތްތަކުގެ ދަފުތަރުގައި ހިމެނުމުގެ ޚިދުމަތްބީސީސީން ފެށި ކްރިއޭޓިވް އިކޮނޮމީ ފަންޑު ހޯދުމުގެ ޚިދުމަތް

މީގެ ކުރިން މި ޚިދުމަތްތަކަކީ ބީސީސީގެ ވެބްސައިޓުގައި ހިމެނިފައިވާ ވަކިވަކި ޚިދުމަތްތަށްވީ ނަމަވެސް، ކުމެވި ޕޯޓަލާ އެކު އީފާސް މެދުވެރިކޮށް ލޮގްއިން ވެގެން އެ ހުރިހާ ޚިދުމަތެއް ވެސް އެއް މަންސައަކުން ލިބޭނެ މަގު މިހާރު މިވަނީ ތަނަވަސްވެފަ އެވެ.