ކުރީގެ މަޝްހޫރު ލަވަކިޔުންތެރިޔާ، މއ. ތަބައްގޭ، މުހައްމަދު ޝަހުބާން ކުއްލިގޮތަކަށް ނިޔާވެއްޖެ އެވެ.

ޝަހުބާން ރޭ ކުއްލިގޮތަކަށް ނިޔާވިއިރު އުމުރަކީ 53 އަހަރު އެވެ. އޭނާ އަކީ މަޝްހޫރު ބޮޑުއަކުރު ލިއުންތެރިޔާ ތަބައްގޭ އަލީ ފަހުމީ (ތަބަށް އަލިފުޅު) ކާފަ ދަރިއެކެވެ. ޝަހުބާން ނިޔާވިކަން އެނގުނީ، ހުޅުމާލޭގައި އޭނާ ދިރިއުޅޭ ފްލެޓްގައި، މަޣުރިބު ނަމާދަށް ވުޟޫކުރަން ފާހާނާއަށް ވަން ގޮތަށް ޚަބަރެއް ނުވެގެން ދޮރު ހުޅުވައިގެން ބެލުމުންނެވެ.

ސްކޫލު ލަވަ މުބާރާތުގައި ވެސް ވަރަށް ބޮޑަށް ފާހަގަވި ޝަހުބާންއަކީ އެތައް ކުދިންނަށް އުގަންނައި ދިނުމުގައި ވެސް ހަރަކާތްތެރިވި މީހެކެވެ. އޭނާއަކީ މަޝްހޫރު ގިނަ ލަވަތަކެއް ވެސް ކިޔާފައިވާ ގިނަ ބައެއްގެ މަގުބޫލުކަން ހޯދި ފަންނަނާނެކެވެ.

ލަވަކިއުން ހުއްޓައިލުމަށްފަހު ޝަހުބާން ފަހުން ހަރަކާތްތެރިވެފައި ވަނީ ނޭޝަނަލް ސެންޓަ ފޮ ދި އާޓްސްގެ މިއުޒިކް ގްރޫޕުގެ ޓެކްނިކަލް މީހެއްގެ ގޮތުގައާއި ކޯޗެއްގެ ގޮތުގަ އެވެ

ޝަހުބާން ނިޔާވިއިރު، ދެ ފިރިހެން ދަރިން އެބަތިއްބެވެ.

ޝަހުބާންގެ ކަށުނަމާދު ކުރުން އޮންނާނީ މިއަދު މެންދުރު ނަމާދަށް ފަހު އެވެ.

އޭނާ ކުއްލި ގޮތަކަށް ނިޔާވުމާ ގުޅިގެން ވަރަށް ގިނަ ބަޔަކު އަންނަނީ ސޯޝަލް މީޑިއާގައި އޭނާ އަށް ހެޔޮ ދުއާ ކުރަމުންނެވެ.