ރައީސުލްޖުމްހޫރިއްޔާގެ ނައިބު ފައިސަލް ނަސީމް، ވެލާނާ އިންޓަނޭޝަނަލް އެއާޕޯޓަށް ވަޑައިގެން އެއާޕޯޓުގައި ހިދުމަތްދެމުން ގެންދާ އެކި މުވައްސަސާތަކުގެ މަސައްކަތްތައް ބައްލަވާލައްވައި، ފަސިންޖަރުގެ ޝަކުވާތަކުގެ އަޑު ވެސް އައްސަވައިފި އެވެ.

ވެލާނާ އެއާޕޯޓުން ފަސިންޖަރުންނަށް ދޭ ހިދުމަތުގެ ފެންވަރު ދަށްވެ، ޑިޕާޗާ އަދި އެރައިވަލް ހޯލުގެ ކައުންޓަރުތަކުގެ ހިދުމަތް ލަސްވެ، ޓޫރިސްޓުންގެ ޝަކުވާ އިތުރުވެފައިވެ އެވެ. ހާއްސަކޮށް އިންޑިއާއިން ކަރަންޓީނުވުމަށް ގިނަ އަދަދެއްގެ މީހުން ދާދިފަހުން އައިއިރު އެއާޕޯޓު ތެރޭގައި ތޮއްޖެހި، އެތަނުގެ ހިދުމަތް ވަރަށް ބޮޑަށް ލަސްވެ، ރިސޯޓުތަކުން ވެސް ޝަކުވާކުރި އެވެ.

ރައީސް އޮފީހުން ބުނިގޮތުގައި ނައިބު ރައީސް ވެލާނާ އިންޓަނޭޝަނަލް އެއާޕޯޓަށް އިއްޔެ ކުރެއްވި ޒިޔާރަތުގައި އެމަނިކުފާނު ވަނީ އެއާޕޯޓުގައި މަސައްކަތްކުރެއްވި އެކި މުއައްސަސާތަކުގެ މުވައްޒަފުންނާއި ބައްދަލުކުރައްވައި، އެބޭފުޅުންގެ މަސައްކަތްތައް ކުރިއަށްދާގޮތާއި، މަސައްކަތުގެ މާހައުލުގައި ދިމާވާ ގޮންޖެހުންތަކަކީ ކޮބައިކަމުގެ މައުލޫމާތުތައް ހޯއްދަދަވާފަ އެވެ.

މިގޮތުން ރައީސުލްޖުމްހޫރިއްޔާގެ ނައިބު ވަނީ މޯލްޑިވްސް އިމިގްރޭޝަންއާއި، މޯލްޑިވްސް ކަސްޓަމްސް ސާވިސްގެ އިތުރުން އެމްއޭސީއެލްގެ އިސް ބޭފުޅުންނާ ވެސް މި ޒިޔާރާތުގެ ތެރެއިން ބައްދަލުކުރައްވާފަ އެވެ. އަދި އެބޭފުޅުން ވެސް އެ މުވައްސަސާ ހިންގުމުގައި ދިމާވާ ގޮންޖެހުންތައް ނައިބު ރައީސްއާ ހިއްސާ ކުރައްވާފައިވާ ކަމަށް ވެސް އެ އޮފީހުން ބުންޏެވެ.

ރާއްޖެ އައި ޓޫރިސްޓުތަކެއް ވެލާނާ އިންޓަނޭޝަނަލް އެއާޕޯޓުގެ ޑިޕާޗާ ޓާމިނަލްގެ ބޭރުގައި މަޑުކޮށްލައިގެން. ފޮޓޯ: އަބްދުﷲ ޖަމީލް | ހުރިހާ

މިގޮތުން ރާއްޖެއަށް އަންނަ ފަތުރުވެރިންގެ އަދަދު ގިނަކަން ފާހަގަކޮށްފައިވާއިރު، ރާއްޖެ އަންނަ ފަތުރުވެރިންނަށް އެ މުވައްސަސާއިން ދޭ ހިދުމަތްތައް އިތުރަށް ފުރިހަމަކުރުމާ ގުޅޭގޮތުން ކުރެވިދާނެ އެކި ކަންކަމާއި ގުޅޭގޮތުން ވާހަކަދައްކަވާފައިވާ ކަމަށް ވެސް ރައީސް އޮފީހުން ބުންޏެވެ.

އެ އޮފީހުން ބުނީ ކޮވިޑާ ގުޅިގެން އަޅާފައިވާ ފިޔަވަޅުތަކަށް ސަމާލުވެ އެއާ އެއްގޮތަށް އަމަލުކުރުމަށް ނައިބު ރައީސް އިލްތިމާސްކޮށްފައިވާއިރު، މިހާލަތުގައި މުއައްސަސާތަކުން ވެސް ގުޅިގެން މަސައްކަތް ކުރެއްވުމަށް ވެސް އެ މަނިކުފާނު އިލްތިމާސްކުރެއްވި ކަމަށެވެ.

ރާއްޖެ އައި ޓޫރިސްޓުތަކެއް ވެލާނާ އިންޓަނޭޝަނަލް އެއާޕޯޓުގެ ޑިޕާޗާ ހޯލުގެ ޗެކިން ކައުންޓަރު ކައިރީގައި މަޑުކޮށްލައިގެން. ފޮޓޯ: އަބްދުﷲ ޖަމީލް | ހުރިހާ

މީގެ އިތުރުން ވެސް އެމަނިކުފާނު ވަނީ ޑޮމެސްޓިކް ޓާމިނަލްއަށް ވަޑައިގެން އެތަނުގެ މަސައްކަތްތައް ވެސް ބައްލަވާލެއްވި ކަމަށް ރައީސް އޮފީހުން ބުންޏެވެ. އަދި އެއާޕޯޓުގައި އަލަށް ތަރައްގީކުރާ ވީއައިޕީ އާއި ސީއައިޕީގެ މަސައްކަތްތައް ކުރިއަށްދާ ގޮތް ނައިބު ރައީސް ބައްލަވާލެއްވި ކަމަށް ވެސް އެ އޮފީހުން ބުންޏެވެ.