ކުރީގެ ކޮމިޝަނާ ޖެނެރަލް އޮފް ކަސްޓަމްސް އަދި "އޮންދިގޯ"ގެ ވެެރިޔާ ކަމަށްވާ މުހައްމަދު ޖުނައިދުގެ މައްޗަށް ތުހުމަތުކުރާ ޖިންސީ ގޯނާގެ މައްސަލަތަކެއް ފުލުހުން ބަލަން ފަށައިފި އެވެ.

މި މައްސަލައާ ގުޅިގެން ފުލުހުން ބުނީ އޮންދިގޯގައި މަސައްކަތްކުރި އަންހެން މުވައްޒަފަކަށް ޖިންސީ ފުރައްސާރަ އާއި ޖިންސީ ގޯނާކުރި ކަމަށް ތުހުމަތު ކުރެވޭ މައްސަލައެއް ފުލުހުންނަށް އެނގުމާ ގުޅިގެން އެ މައްސަލަ މިހާރު ތަހުގީގު ކުރަމުން ގެންދާ ކަމަށެވެ.

ޖުނައިދުގެ މައްޗަށް ޖިންސީ ގޯނާގެ މައްސަލަ ފެންމަތިވީ އޭނާއަށް ތުހުމަތުކުރާ އަންހެން މުވައްޒަފު،ސޯޝަލްމީޑިއާގައި ޕޯސްޓެއް އާންމުކުރުމާ ގުޅިގެންނެވެ. އެ ޕޯސްޓުގައިވާ ގޮތުން އޭނާ އެ ވަޒީފާއިން ކެނޑެން ދިމާވީ ޖުނައިދު ޖިންސީ ފުރައްސާރަ ކުރަން ފެށުމުން ކަމަށް ބުނެފައިވެ އެވެ.

އޭގެ އިތުރުން އެ ޕޯސްޓުގައި އެތަށް ފަހަރަކު ޖުނައިދުގެ ފަރާތުން ޖިންސީ ފުރައްސާރައާ ކުރިމަތިލާން ޖެހުނުކަން އޭނާ ފާހަގަކޮށްފައިވެ އެވެ. އަދި ގަދަކަމުން ގައިގައި އަތްލަން އުޅުނު ކަމަށާއި، އޭނާއަށް ޖިންސީ ގޯނާކުރިކަމަށް ވެސް އެ ޕޯސްޓުގައި ތުހުމަތުކޮށްފައިވެ އެވެ.

މި މައްސަލަައާ ގުޅިގެން މިމަހުގެ އެއްވަނަ ދުވަހުން ފެށިގެން އޭނާ ވަޒީފާއަށް ދިއުން ހުއްޓާލި ކަމަށާއި، މިކަން އޭނާ ސޯޝަލް މީޑިއާގައި ހާމަކުރީ ޖުނައިދު ކުރި ކުށަށް އޭނާ ބޭޒާރުކޮށްލުމަށާއި، އިންސާފު ހޯދުމަށް ކަމަށް އޭނާ ބުންޏެވެ.

ނަމަވެސް މިކަމާ ޖުނައިދު ވަނީ ދެކޮޅު ހަދައިފަ އެވެ. އަދި އެއްވެސް މުވައްޒަަކަށް ޖިންސީ ފުރައްސާރަކޮށްފައެއް ނުވާނެ ކަމަށް އޭނާ ބުނެފައިވެ އެވެ.

ޖުނައިދު ވިދާޅުވާގޮތުގައި އޭނާގެ މައްޗަށް ދޮގު ތުހުމަތުތަކެއް ކުރީ އަންހެން މުއައްޒަރު ވަޒީފާއަށް ގަވާއިދުން ނުދާ މައްސަލަ ބެލުމާ ގުޅިގެންނެވެ.