ގިނަ ބަޔަކު އާބާދުވާން ފަށާފައިވާ ހުޅުމާލޭގެ ދެވަނަ ފިޔަވަހީގައި ދެ ފިހާރައެއް ހުޅުވަން ހަމަޖެހިއްޖެކަމަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.

ގިނަ އަދަދެއްގެ ބަޔަކަށް އެއްފަހަރާ ބޯހިޔާވަހިކަން ފޯރުކޮށްދިނުމަށް ކުރީ ސަރުކާރުން ހިންގި އެންމެ ބިޔަ އެއް ހައުސިން މަޝްރޫއުއެއްގެ ގޮތުގައި ހިޔާ މަޝްރޫއު ހިމެނެ އެވެ. އަދި އެ ތަން ނިމި ގިނަ އަދަދެއްގެ މީހުން ހިޔާ ފްލެޓްތަކަށް ބަދަލުވެ ވަޒަންވެރިވެފައިވާއިރު، އާބާދު ވަމުން އަންނަ ވަރަކަށް އެ ސަރަހައްދުގައި ސްކޫލްތަކާއި، ފިހާރަތަކާއި، ޖިމް، ސެލޫން އަދި އެހެނިހެން ތަންތަން އެޅުމަށް ވެސް ސަރުކާރުން މަސައްކަތްކުރަމުން އެބަގެންދެ އެވެ.

މިގޮތުން މި މަސް ތެރޭގައި އިތުރު ދެ ފިހަރާއެއް ހުޅުވުމަށް ހަމަޖެހިފައިވާކަން ހާމަކޮށް އެޗްޑީސީން މީޑިޔާތަކަށް މައުލޫމާތުދެމުން ބުނީ ހިޔާ ފްލެޓް ސަރަހައްދުގައި އިތުރު ދެ ސުޕަމާކެޓަކާއި، ހަތަރު ގްރޯސަރީ ސްޓޯރެއް ހުޅުވުމަށް ހަމަޖެހިފައިވާ ކަމަށެވެ. އޭގެ އިތުރުން އަށް ރީޓެއިލް ފިހާރައެއް އަޅަން ބަޔަކާ ހަވާލުކޮށްފައިވާ ކަމަށް ވެސް އެޗްޑީސީން ބުނެފައިވެ އެވެ.

ހިޔާ ފްލެޓްތައް ކައިރީގައި މިހާތަނަށް ހުޅުވާފައިވަނީ އެއް ފިހާރަ އެވެ. އެހެންނަމަވެސް ބޭނުންވާ ބައެއް ތަކެތި އެފިހާރައިން ނުލިބުމާއި ގުޅިގެން، ހިޔާގައި ދިރިއުޅޭ މީހުން، ހުޅުމާލެ ފުރަތަމަ ފިޔަވައްސަށް ދާންޖެހޭ މައްސަލަ ވަނީ ފެންމަތިވެފަ އެވެ.

ހަމައެހެންމެ މިފަދަ ކަންކަމާއި ގުޅިގެން ދިމާވާ ދަތިތަކުގެ ސަބަބުން ބައިސްކަލުގެ ވަށިގަނޑުގަ އާއި ޕިކަޕްތަކުގަ އާއި ގާޑިޔާތަކުގައި މުދާ އަތުރައިގެން ބިދޭސީންނާއި ދިވެހިން ވިޔަފާރިކުރަން ފަށާފައިވާއިރު، ހުއްދަ ހޯދައިގެން އެސަރަހައްދުގައި ވިޔަފާރިކުރާ މީހުން ވަނީ މިކަމާއިވެސް ކަންބޮޑުވުން ފާޅުކޮށްފަ އެވެ.