އެޗްޑީސީގެ މުވައްޒަފުންނަށް ފްލެޓް ދީފައި، ފަނޑިޔާރުންނަށް ފްލެޓް ނުދޭތީ ޑްރަގް ކޯޓުގެ ގާޒީ މުހައްމަދު ނައީމް ކަންބޮޑުވުންފާޅުކުރައްވައިފި އެވެ.

އެޗްޑީސީގެ މުވައްޒަފުންނަށް ފްލެޓް ދިނުމަށް ނިންމި ކަމަށް ނޫހެއްގައި ލިޔެފައިވާ ޚަބަރެއް ޝެއާކުރައްވައި ގާޒީ ނައީމް ވިދާޅުވީ ހިތްވަރެއް ހުރިއްޔާ ހައްގުތައް ހޯދުމަށް ފަނޑިޔާރުންގެ ޖަމިއްޔާއިން އިހްތިޖާޖަށް ނުކުންނަންވީ ކަމަށެވެ.

ގާޒީ ނައީމް ވިދާޅުވީ އުއްތަމަ ފަނޑިޔާރާއި ޖުޑިޝަރީގެ ވެރިންގެ ކަރު ބުޑުގައި ރަހަލާ ވަރުގެ ކަންތައް ކޮށްގެން މެނުވީ އެކަން ރަނގަޅުނުވާނެ ކަމަށެވެ.

އަނގަ ތެޅުމުގެ ޒަމާން މާޒީވެ ހިނގައްޖެ ކަމަށާއި މިހާރު ބޭނުމީ ހަރަކާތް ކަމަށް ގާޒީ ނައީމް ވިދާޅުވި އެވެ.

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ވަނީ ބައެއް ފަނޑިޔާރުންނަށް ފްލެޓްދީފަ އެވެ. އޭގެރޭގައި އޭރުގެ ސުޕްރީމް ކޯޓުގެ ފަނޑިޔާރުންނާއި ސުޕީރިއާ ކޯޓުތަކުގެ ބައެއް ފަނޑިޔާރުން ހިމެނެ އެވެ. ސުޕްރީމް ކޯޓުގެ އޭރުގެ ފަނޑިޔާރުންނަށް ދިނީ ރެހެންދި ފްލެޓެވެ. އަދި ސުޕީރިއާ ކޯޓުތަކުގެ ބައެއް ފަނޑިޔާރުންނަށް ޓާޓާ ފްލެޓްތަކުން ފްލެޓް ދީފައިވެ އެވެ.