ޓީޗަރުންގެ މުސާރަ ބޮޑުކުރިއިރު، އެމްއެންޔޫގެ ލެކްޗަރާއިންނާއި މުވައްޒަފުންގެ މުސާރަ ބޮޑުކޮށްފައިނުވާތީ އެ ޔުނިވާސިޓީގެ މުވައްޒަފުން ހިމޭން އިހްތިޖާޖެއް ކޮށްފި އެވެ.

އެމްއެންޔޫގެ ގިނަ އަދަދެއްގެ މުވައްޒަފުން މިއަދު ހެނދުނު އެ މުޒާހަރާގައި ބައިވެރިވީ ކަޅު ހެދުމުގަ އެވެ. އެކި ޝުއޫރުތައް ލިޔެފައިވާ ބެނާތައް ހިފައިގެން ކުރިއަށްގެންދިޔަ އެ ހިމޭން އިހްތިޖާޖަކީ ސުލްހަވެރި އިހްތިޖާޖެކެވެ.

ލެކްޗަރާއިންނާއި މުވައްޒަފުން ޑިމާންޑް ކުރަނީ މެއި 1 އިން ފެށިގެން އެ މީހުންގެ މުސާރަ ބޮޑުކޮށްދިނުމަށެވެ.

ފިނޭންސް މިނިސްޓަރު އިބްރާހިމް އަމީރު ވަނީ ލެކްޗަރާއިންގެ މުސާރަ ބޮޑުކުރުމަށްޓަކައި ކުރަންޖެހޭ މަސައްކަތްތައް ކުރަމުން އަންނަ ކަމަށް ވިދާޅުވެފަ އެވެ.

ސުކޫލު ޓީޗަރުންގެ ގޮތުގައި 6،815 މުވައްޒަފުންގެ ތެރެއިން ވަކި ވަކި ރޭންކުތަކަށް އަންނާނެ ބަދަލުތައް މިނިސްޓަރު އަމީރު ވަނީ ހިއްސާކުރައްވާފަ އެވެ. ރޭންކު އެކެއްގެ ޓީޗަރުންގެ މުސާރައަށް 22 ޕަސެންޓްގެ ބަދަލެއް، ރޭންކު 2 ގެ މުވައްޒަފުންނަށް 50 ޕަސެންޓްގެ ބަދަލެއް އަދި ރޭންކު ތިނެއްގެ މުވައްޒަފުންނަށް 38 ޕަސެންޓްގެ ބަދަލެއް ވަނީ ގެނެސްފަ އެވެ.

ޓީޗަރުންނަށް މީގެ ކުރިން ލިބެމުން އައި މުސާރައާއި ދެން ލިބޭނެ މުސާރަ

ރޭންކު 1- ކުރިން ލިބެމުން ދިޔައީ އެވްރެޖުކޮށް، 10،889ގެ މުސާރައެއް. ގެނެވުނު ބަދަލާއެކު 13،266 ރުފިޔާގެ މުސާރައެއް ލިބޭނެ.

ރޭންކު 2- ކުރިން ލިބެމުން ދިޔައީ އެވްރެޖުކޮށް، 13،089ގެ މުސާރައެއް. ގެނެވުނު ބަދަލާއެކު 19،467 ރުފިޔާގެ މުސާރައެއް ލިބޭނެ.

ރޭންކު 3- ކުރިން ލިބެމުން ދިޔައީ އެވްރެޖުކޮށް، 15،135ގެ މުސާރައެއް. ގެނެވުނު ބަދަލާއެކު 20،895 ރުފިޔާގެ މުސާރައެއް ލިބޭނެ.

މީގެ އިތުރުން ޕްރިސިޕަލުން 30 ޕަސެންޓާއި 35 ޕަސެންޓްގެ މުސާރަ ބޮޑުވިއިރު ލީޑިން ޓީޗަރުންގެ މުސާރައިގެ އިތުރުން ޓެނުއަޝިޕް އެލަވަންސަށް 2،000ރ. އަދި ތައުލީމީ ދާއިރާގެ އިދާރީ މުވައްޒަފުންނަށް މުސާރައިގެ 35 ބޮޑުކޮށްފައިވެ އެވެ.