ތ. މަޑިފުއްޓަށް މަސްތުވާތަކެތި އެތެރެކުރި މީހެއްގެ މައްޗަށް ކުށް ސާބިތުވެ 27 އަހަރަށް ޖަލަށްލުމަށް އެ ރަށު މެޖިސްޓްރޭޓް ކޯޓުން ހުކުމްކޮށްފި އެވެ.

މަޑިފުށި މެޖިސްޓްރޭޓް ކޯޓުން އެ ހުކުމް ކުރީ އެ ރަށު ދޮންވެލީގޭ، ހުސައިން ޝަރޫންގެ މައްޗަށެވެ. އޭނާގެ މައްޗަށް އިއްވާފައި ވަނީ 27 އަހަރާއި 11 މަހާއި 20 ދުވަހަށް ޖަލު ހުކުމެކެވެ.

ފުލުހުން ބުނީ މިދިޔަ ފެބްރުއަރީ މަހުގެ ފަސްވަނަ ދުވަހުގެ ވަގުތެއްގައި މަޑިފުއްޓަށް މަސްތުވާތަކެތި އެތެރެކުރާ ކަމަށް ބުނެ ލިބުނު މައުލޫމާތަކާ ގުޅިގެން އެ ރަށުގެ ބަނދަރުމަތިން ޝަރޫން ހުއްޓުވައި ބަލައި ފާސްކުރި ކަމަށެވެ.

އެ ދުވަހު ޝަރޫން ބަލައި ފާސްކުރުމުގެ ތެރޭގައި އޭނާގެ އަތުން މަސްތުވާތަކެތި ފެނުނު ކަމަށް ފުލުހުން ބުންޏެވެ.