އެނބޫދޫ ފިނޮޅު ކައިރީގައި އޮތް ތެޔޮ ބޯޓެއްގައި މިއަދު ހަވީރު ރޯވެ އަޑިއަށް ހިނގައްޖެ އެވެ.

އެމްއެންޑީއެފް އިން ބުނީ އެ ހާދިސާގެ ރިޕޯޓު ލިބުނީ މިއަދު 5:50 ގަ ކަމަށެވެ.

އެމްއެންޑީއެފްއިން ބުނީ ރޯވި ބޯޓުގައި 60،000 ލީޓަރު ޑީސަލް ހުރި ކަމަށެވެ. ބޯޓުގައި ރޯވީ ތެޔޮ ބަރުކޮށްގެން، މާލެ އިން ލ. އަތޮޅަށް ދަތުރުކުރަމުން ދަނިކޮށެވެ. އަލިފާން ރޯވާން ދިމާވި ސަބަބެއް އަދި ނޭގެ އެވެ.

ބޯޓުގައި ރޯވި އަލިފާން ނިއްވާލުމުގެ މަސައްކަތް ކުރަމުން ދަނިކޮށް، މިއަދު 6:27 ގައި ބޯޓު އަޑިއަށް ގޮސްފައިވާ ކަމަށް އެމްއެންޑީއެފްއިން ބުންޏެވެ.

ރޯވި ބޯޓުގެ ފަޅުވެރިން ކަނޑުވެފައި ވަނިކޮށް އެމީހުން ވަނީ މިހާރު މާލެ ގެނެސްފަ އެވެ. އެމީހުން މާލެ ގެނައީ ކާނި ހޮޓަލްސްގެ ލޯންޗެއްގަ އެވެ. އެ ބޯޓުގައި ޖުމްލަ ތިއްބެވީ ތިން ދިވެހިންނާއި އެއް ބިދޭސީ އެކެވެ.