އަންހެން ކުދިން ހިތާނުކުރަން ހިތްވަރުދޭ ކަމަށް ބުނެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް މައްސަލަ ހުށައެޅުމަކީ ބިރު ދެއްކުމުގެ އަމަލެއް ކަމަށް ޑރ. މުހައްމަދު އިޔާޒު ވިދާޅުވެއްޖެ އެވެ.

ދީނީ އިލްމުވެރިޔާ ޑރ. އިޔާޒު ކުރެއްވި ކުރެއްވި ޓުވީޓަކާ ގުޅިގެން މީކާއިލް މިއަދު މަޖިލީހުގެ ރައީސް މުހައްމަދު ނަޝީދަށް ފޮނުއްވި ސިޓީއެއްގައި ވިދާޅުވެފައި ވަނީ މިއަދުގެ 9:14 ހާއިރު ދިވެހި ރާއްޖޭގެ ގައުމީ ޔުނިވާސިޓީގެ އެސިސްޓަންޓް ޕްރޮފެސަރު ޑރ. މުހައްމަދު އިޔާޒު ޓުވީޓެއް ކުރައްވާފައިވާ ކަމަށެވެ. އެ ޓުވީޓްގައި އަންހެނުން ހިތާނު ކުރުމުގެ ނަމުގައި ހިންގާ، ފީމޭލް ޖެނިޓަލް މިއުޓިލޭޝަން (އެފްޖީއެމް) އަށް ހިތްވަރު ދީފައިވާ ކަމަށެވެ.

އެ ސިޓީގައި މީކާއިލް އިތުރަށް ވިދާޅުވެފައި ވަނީީ، އެފަދަ އަމަލުތަކަށް ހިތްވަރު ލިބޭ ގޮތަށް މުއައްސަސާތަކުގެ ޒިންމާދާރު މަގާމުތަކުގައި ތިއްބަވާ ބޭފުޅުން މަސައްކަތް ކުރުމަކީ ރާއްޖޭގައި އަންހެނުން ނުރަކަލަށް ހުށަހެޅޭ ކަމެއް ކަމަށެވެ. އަދި އެއީ އަންހެނުންގެ ހައްގުތައް ރައްކާތެރި ކުރުމަށް ވެސް ހުރަސް އެޅޭނޭ ކަމެއް ކަމަށް ވެސް އެ ސިޓީގައި ވިދާޅުވެފައިވެ އެވެ.

މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީ މެދުވެރިކޮށް، އެ މައްސަލަ ބައްލަވައި ދިނުމަށް ވެސް މެމްބަރު މީކާއިލްގެ ސިޓީގައި އެދިވަޑައިގެންފައި ވެ އެވެ.

މީކާއިލްގެ ސިޓީއާ ގުޅިގެން ޑރ. އިޔާޒް ވިދާޅުވީ މީކާއީލް ހިންގެވީ ބިރު ދެއްކުމުގެ އަމަލެއް ކަމަށެވެ. އަދި އެ މައްސަލަ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީ ބަލައިދިނުމަށް އެދޭ ކަމަށް ވެސް ވިދާޅުވެފައިވެ އެވެ.

ޑރ. އިޔާޒް ވިދާޅުވީ އޭނާގެ ތިން އަންހެން ކުދިން ތިބޭ ކަމަށާއި، އެ ކުދިން ތިބެނީ ހިތާނުކޮށްފައި ނޫން ކަމަށާއި އަދި އަންހެނުން ހިތާނު ކުރުމަށް ހިތްވަރު ނުދެއްވާ ކަމަށެވެ. އަދި ވިދާޅުވީ އޭނާ ޓުވީޓެއް ކުރެއްވީ އާންމުންގެ މީހަކު ކުރި ސުވާލަކާ ގުޅިގެން އަންހެނުން ހިތާނުކުރުން އިސްލާމް ދީނުގައި އޮންނަނީ ކިހިނެތްކަން އަންގައި ދޭން ކަމަށް ވެސް އޭނާ ވިދާޅުވެފައިވެ އެވެ.

އެމްއެންޔޫގައި އޭނާ އަދާކުރަމުންދާ ވަޒީފާއިން ވަކިކުރުމަށް އެމްޑީޕީ މެމްބަރުން ޕްރެޝަރު ކުރާ ކަމަށާއި އޭނާއާ ދެކޮޅަށް ވާހަކަ ދައްކަނީ ކަންކަމުގެ ހަގީގަތް ނޭނގޭތީ ކަމަށެވެ.