ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)ގެ ވަޒީފާއިން ދީނީ އިލްމުވެރިޔާ ޑރ. މުހައްމަދު އިޔާޒު އަބްދުއްލަތީފް މިއަދު ވަކިކޮށްފި އެވެ.

ޑރ. އިޔާޒު އެމްއެންޔޫގައި އަދާކުރަމުން ދިޔައީ އެސިސްޓެންޓް ޕްރޮފެސަރުގެ ވަޒީފާ އެވެ. މިއަހަރުގެ މާޗް މަހު 14 ދުވަހަށް އިޔާޒު އެ މަގާމުން ސަސްޕެންޑް ވެސް ކުރި އެވެ. އޭރު ސަސްޕެންޑް ކުރީ ސޯޝަލް މީޑިއާގައި ޖެހި ޕޯސްޓްތަކަކާ ގުޅިގެންނެވެ. އެ ފަހަރު އިޔާޒުގެ ސަސްޕެންޝަން އުވާލީ އެފަދަ ކަމެއް ތަކުރާރު ކޮށްފިނަމަ ވަޒީފާއިން ވަކި ކުރާނެ ކަމުގެ ފަހުގެ އިންޒާރު ދިނުމަށްފަހު އެވެ.

މިއަދު ޑރ. އިޔާޒު ވަޒީފާއިން ވަކިކޮށްފައި ވަނީ އަންހެނުން ހިތާނު ކުރުމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓަކާއި ގުޅިގެންނެވެ. އަދި އެ ޕޯސްޓް ކުރެވި ސަބަބު އިޔާޒު ވަނީ ސާފުކޮށްދެއްވާފަ އެވެ. އޭނާ އަންހެނުން ހިތާނު ކުރުމަކީ އޭނާ ހިތްވަރު ދެއްވާ ކަމެއްކަމުގައި ނޫން ކަމަށެވެ. އަދި އެކަން ޕްރޮމޯޓް ވެސް ނުކުރައްވާ ކަމަށެވެ. އެގޮތަށް ޓުވީޓެއް ކުރެއްވީ އާންމުންގެ މީހަކު ކުރި ސުވާލަކާ ގުޅިގެން އަންހެނުން ހިތާނު ކުރުން އިސްލާމް ދީނުގައި އޮންނަނީ ކިހިނެތްކަން އަންގައި ދޭން ކަމަށް ޑރ. އިޔާޒު ވަނީ ވިދާޅުވެފަ އެވެ.

އެ ޓުވީޓާ ގުޅިގެން އާއްމުންގެ ފާޑު ކިޔުން އަމާޒުވުމުން ޑރ. އިޔާޒު ވަނީ މާފަށް އެދިވަޑައިގެން ބަޔާނެއް ނެރެފަ އެވެ. އެ ބަޔާނުގައި ޑރ. އިޔާޒު ވިދާޅުވީ، އަންހެނުން ހިތާނު ކުރުމަކީ އޭނާ ވަކާލާތުކުރެއްވި އަދި ވަކާލާތުކުރައްވާ ކަމެއް ނޫން ކަމަށާއި އެއީ ރާއްޖެއިން ނެތިގޮސްފައިވާ އާދައެއް ކަމުގައި ބެލެވޭއިރު، އެ އާދަ އަނބުރާ އިއާދަ ކުރަން ވެސް ވަކާލާތު ނުކުރައްވާ ކަމަށެވެ.

އެމްއެންޔޫގެ ވައިސް ޗާންސެލާ ޑރ. މުހައްމަދު ޝަރީފް ވިދާޅުވީ އިޔާޒުގެ މައްސަލަ ބެލީ އެމްއެންޔޫގެ ހާއްސަ ކޮމިޓީ އަކުން ކަމަށެވެ. ކޮމިޓީގައި ދީނީ އިލްމުވެރިންގެ އިތުރުން އެކި ދާއިރާތަކުން ތައުލީމް ހާސިލް ކުރައްވާފައިވާ ބޭފުޅުން ވެސް ހިމެނޭ ކަމަށެވެ.