ސިވިލް ސާވަންޓުންގެ ޕާފޯމަނަސް އެލަވަންސް ދޭން ފެށޭނީ 2023 ގައި: އަމީރު

ކޮވިޑް -19އާ ގުޅިގެން މެދު ކަނޑާލާފައިވާ ސިވިލް ސާވިސް މުވައްޒަފުންގެ ޕާފޯމެންސް އެލަވަންސް ދޭން ފެށޭނީ 2023 ގައި ކަމަށް ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެ އެވެ.

އަމީރު މިހެން ވިދާޅުވީ މަޖިލީހުގައި ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ކުރެއްވި ސުވާލަަށް ދެއްވި ޖަވާބުގަ އެވެ.

ސިވިލް ސާވިސްގެ މުވައްޒަފުންގެ ސެޓްފިކެޓް އެލަވަންސާއި ޕާފޯމަންސް އެލަވަންސް ދިނުން ހުއްޓާލައިފައި އޮތުމުން ބައެއް މުވައްޒަފުންގެ ފަރާތުން ހާއްސަ ގޮތެއްގައި ތައުލީމީ ދާއިރާގައި މަސައްކަތްކުރާ ޓީޗަރުންގެ ފަރާތުން ޝަކުވާ ލިބޭ ކަމަށާއި އެހެންކަމުން އެ އެލަވަންސް ދޭން ފަށަނީ ކޮންއިރަކުންތޯ އަދި ދޭން ފަށާއިރު، އެލަވަންސް ނުލިބި ހޭދަވެގެން މިދިޔަ ދުވަސްތައް ހިމަނާނެތޯ ޝަފީގު ސުވާލު ކުރައްވާފައިވެ އެވެ.

މި ސުވާލަށް ލިޔުމުން ދެއްވި ޖަވާބުގައި މިނިސްޓަރު އަމީރު ވިދާޅުވީ ކޮވިޑް -19ގެ ކުރިން ދައުލަތުގެ އާމްދަނީ ހުރި މިންވަރަށް އާމްދަނީ އިއާދަވާނެ ކަމަށް ލަފާކުރެވެނީ 2023 ވަނަ އަހަރު ކަމަށެވެ. އަދި އެ ހިސާބާ ޖެހެންދެން ހަރަދު ކުޑަކުރުމަށް އަޅާފައިވާ ފިޔަވަޅުތައް ދަމަހައްޓަން ޖެހޭ ކަމަށް އަމީރު ވިދާޅުވި އެވެ.

އަމީރު އިތުރަށް ވިދާޅުވީ ކޮވިޑް-19އާ ގުޅިގެން ދައުލަތަށް ގެއްލުނު އާމްދަނީއަކީ އަލުން ލިބޭނެ އާމްދަނީ އަކަށް ނުވާތީ، އާމްދަނީއަށް ކުރި އަސަރުގެ ސަބަބުން ދިނުން ހުއްޓާލާފައި އޮތް އެލަވެންސެއް އަލުން ދޭން ފަށާއިރު އެލަވެންސް ދިނުން ހުއްޓާލާފައި އޮތް ދުވަސްތަކުގެ އެލަވެންސް ދޭން ނުފެންނަ ކަމަށެވެ.

"މިކަން ތަންފީޒުކުރާނެ ގޮތް އެކުލަވާލުމުގެ އިތުރުން ވަޒީފާގެ ގޮތުން އެއްހަމަ މުވައްޒަފުންގެ މެދުގައި މުސާރައާއާއި އެލަވަންސްތައް އެއްހަމަކުރުމުގެ މަސައްކަތް ނެޝެނަލް ޕޭ ކޮމިޝަނުން މިހާރު ދަނީ ކުރަމުންނެވެ. އަދި ކޮވިޑް-19 އާ ގުޅިގެން ގެއްލިގެން ދިޔަ އާމްދަނީ އަކީ މުސްތަގުބަލުގައި ވެސް ދައުލަތަށް ލިބޭނެ އާމްދަނީއެއް ނޫންކަމުން ދެމެހެއްޓެނިވި މިންގަނޑެއްގައި ހަރަދާއި ޑެފިސިޓް ބެހެއްޓުމުގެ ގޮތުން ހުއްޓާލެވެނު އެލަވަންސެއް އަލުން ދޭން ފަށާއިރު އެ އެލަވަންސް ނުލިބި ދިޔަ ދުވަސްތައް ހިމަނަން ނުފެންނަ ކަމަށް ދަންނަވަމެވެ،" އަމީރު ލިޔުމުން ދެއްވި ޖަވާބުގައިވެ އެވެ.

މީގެ އިތުރުން ކޮވިޑުގެ ހާލަތުގައި އެހެން ދާއިރާތަކުގެ މުވައްޒަފުންގެ އާމްދަނީއަށާއި ވަޒީފާއަށް އަސަރުކުރި ނަމަވެސް ސިވިލް ސާވިސް މުވައްޒަފުންގެ މުސާރަ އާއި ވަޒީފާއަށް އަސަރުނުކޮށް ދައުލަތުގެ ހަރަދުތައް މެނޭޖު ކުރެވުމަކީ، ރާއްޖޭގެ އިގްތިސާދުގެ ތިންބައިކުޅަ އެއްބައި ފޮހެވިގެންދިޔަ އަހަރެއްގައި ލިބިފައިވާ ކާމިޔާބެއްކަމަށް މިނިސްޓަރު ވިދާޅުވި އެވެ.

"ނަމަވެސް މިފަދައިން މެނޭޖުކުރުމާއެކު ދައުލަތުގެ ދަރަނި އިތުރުވެފައިވާތީ، މި އިގްތިސާދީ ތަދުމަޑުކަމުން އަރައިގަތުމަށް ކުރާ މަސައްކަތް ކޮވިޑް-19ގެ ބަލިމަޑުކަމުން އަރައިގަނެވުނަސް ކުރިއަށް ގެންދަން ޖެހެ އެވެ،" މިނިސްޓަރު ލިޔުމުން ފޮނުއްވި ޖަވާބުގައިވެ އެވެ.

އަމިރު މިހެން ވިދާޅުވެފައިވާއިރު މުސާރައާއި އެލަވަންސްތަކުގެ މައްސަލައިގައި ސިވިލްސަރވިސްގެ މުވައްޒަފުން މިހާރުވެސް ގެންދަނީ އިހްތިޖާޖު ކުރަމުންނެވެ.