މޯލްޑިވްސް ނެޝަނަލް ޕާޓީ (އެމްއެންޕީ)ގެ ނަމުގައި އަލަށް އުފައްދާފައިވާ ޕާޓީއަށް ސިޔާސީ ޕާޓީ އުފެއްދުމަށް ބާއްވާ ބައްދަލުވުން ބޭއްވުމުގެ ހުއްދަ އިލެކްޝަން ކޮމިޝަނުން ދީފިއެވެ.

މިގޮތުން އިލެކްޝަނުން ކުރި ޓުވީޓެއްގައި ބުނެފައި ވަނީ، އެމްއެންޕީން ޕާޓީއެއް އުފެއްދުމަށް ބޭނުންވާ 3،000 ސައްހަ ފޯމު އެ ކޮމިޝަނަށް ހުށަހަޅާފައިވާތީ އެ ޕާޓީއަށް، ސިޔާސީ ޕާޓީ އުފެއްދުމަށް ބާއްވާ ބައްދަލުވުންތައް ބޭއްވުމަށް ހުއްދަ ދޭ ކަމަށެވެ.

ސައްހަ 3،000 މެމްބަރުންގެ ސޮޔާއެކުގައި އިލެކްޝަންސް ކޮމިޝަންގައި ސިޔާސީ ޕާޓީއެއް ރަޖިސްޓްރީ ކުރެވޭއިރު، އެމްއެންޕީން ވަނީ ރަޖިސްޓްރީ ކުރެވޭ މެމްބަރުންގެ އަދަދަށް ވުރެ ވެސް ގިނަ މެމްބަރުންނާއެކު، އިލެކްޝަންސް ކޮމިޝަނަށް ހުށަހަޅާފަ އެވެ.

މިގޮތުން ޕާޓީ ހިންގުމަށް ހުއްދަ ދިންތާ އެންމެ ދެމަހުގެ ތެރޭގައި އެޕާޓީން ވަނީ 5،000 މެމްބަރުންގެ ސޮއާއިއެކު ރަޖިސްޓަރީ ކުރުމަށް އިލެކްޝަން ކޮމިޝަނަށް ހުށަަހަޅާފަ އެވެ. އަދި ކުރިއަށް އޮތް ރިޔާސީ އިންތިހާބުގެ ކުރިން ޕާޓީއަށް 10،000 މެމްބަރުން ހަމަކުރުމަށް އަމާޒުކުރާކަމަށް ކާނަލް މުހައްމަދު ނާޒިމް ވަނީ ވިދާޅުވެފަ އެވެ.

މިގޮތުން ކާނަލް ނާޒިމާއި، ތިމަރަފުށީ ދާއިރާގެ ރިޔާޒްގެ އިތުރުން މުހައްމަދު ނަޝީދު އާއި އަބްދުލް މުހުސިން ހަމީދު އިސްވެ ހުންނަވައިގެން އެމްއެންޕީ އުފެއްދުމަށް އިލެކްޝަނަށް ހުށަހަޅާފައި ވަނީ މަސްއޫލުވެރިއެއްގެ ގޮތުގައި ހުންނަވައިގެން ވިލިމާލެ ދާއިރާގެ މެމްބަރު އަހްމަދު އުޝާމް އެވެ. މި ޕާޓީ ހިންގުމަށް ހުއްދަ ދީފައި ވަނީ މިއަހަރު ޖުލައި މަހުގެ 15 ވަނަ ދުވަހު އެވެ.