ކުޑަކުދިންގެ ހިޔާގައި ތިބި ކުދިންތަކެއްގައި، ގަވާއިދާ ހިލާފަށް ބިޑިއަޅުވައި، ޓޯޗަރގެ ޢަމަލެއް ހިންގިކަމުގެ ތުހުމަތުގައި ހިއުމަން ރައިޓްސް ކޮމިޝަނުން ކުރީގެ ޖެންޑަރ މިނިސްޓަރ ޒެނީޝާ ޒަކީ އާއި ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން (އެފްސީޕީ) ގެ ވެރިޔާ ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރުގެ މައްޗަށް ދައުވާ ކުރުމަށް ޕީޖީ އޮފީހަށް ފޮނުވި މައްސަލައިގައި އެ ދެބޭފުޅުންގެ މައްޗަށް ދައުވާ ކުރެވޭ ވަރަށް ހެކި ލިބިފައި ނުވާ ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފި އެވެ.

އެ އޮފީހުން ހާމަކޮށްފައިވާ ގޮތުގައި ދައުވާ ކުރަން ފޮނުވާފައިވަނީ އެކަމުގައި ބައިވެރިވި ފުލުހުންގެ މައްޗަށެވެ.

ޕްރޮސެކިއުޓަރ ޖެނެރަލް ހުސައިން ޝަމީމް ކުރެއްވި ޓުވީޓެއްގައި ވަނީ ކުޑަކުދިންގެ ހިޔާގައި ތިބި ކުދިންތަކެއްގައި، ގަވާއިދާ ހިލާފަށް ބިޑިއަޅުވައި، ޓޯޗަރގެ ޢަމަލެއް ހިންގިކަމުގެ ތުހުމަތުގައި، އެކަމުގައި ޢަމަލީގޮތުން ބައިވެރިވިކަމަށް ހެކި ލިބުނު 13 މީހެއްގެ މައްޗަށް ދައުވާ އުފުލާފައިވާ ކަމަށެވެ. އަދި އެކުދިންނަކީ ދައުލަތުން ހާއްސަ ހިމާޔަތެއް ދޭންޖެހޭ ބައެއް ކަމަށްވެސް ބުނެފައިވ އެވެ.

ކުޑަކުދިންގެ ހިޔާގައި ހިނގި ހިނގި ހަމަނުޖެހުން ކޮންޓްރޯ ކުރުމަށް ފުލުހުން ވަނީ އެތަނުގައި ތިބި ކުދިން ފަހަތަށް ބިޑިއަޅުވައި، ގަވާއިދާއި ހިލާފަށް ޓޯޗަރ އަމަލުތަކެއް ހިންގާފައި ކަމަށް ހިއުމަންރައިޓްސް ކޮމިޝަންގެ ރިޕޯޓްގައި ފާހަގަކޮށްފައިވެ އެވެ. އަދި މިމައްސަލަ އެޗްއާރުސީއެމްއިން ވަނީ ވަރަށް ސީރިއަސް މައްސަލައެއްގެ ގޮތުގައި ތަހުގީގް ކޮށްފަ އެވެ.

ޒެނީޝާގެ މައްޗަށް ދައުވާ ކުރަން ޕީޖީއަށް ފޮނުވުމާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އެ ދައުވާ އަނބުރާ ގެންދިއުމަށް ގޮވާލާފަ އެވެ. އަދި މެދު ހެންވޭރު ދާއިރާގެ މެމްބަރު އަލީ އާޒިމްވެސް ވަނީ އެއީ ޒާތީ ކަމެއްކަމަށް ބެލެވޭ ކަމަށް ބުނެފަ އެވެ.