ރޭ އިދިކޮޅުން ބޭއްވި ކޮތަރު ކޮށި ޖަލްސާގައި ރައީސް ޔާމީން ދެއްކެވި ވާހަކަފުޅަކާ ގުޅިގެން އިލެކްޝަންސް ކޮމިޝަންގެ ކުރީގެ ރައީސް އަޙްމަދު ޝަރީފް (އީސީ ޝަރީފް) ރުޅިގަދަ ވެއްޖެ އެވެ.

ރޭގެ ޖަލްސާގައި ރައީސް ޔާމީން ވިދާޅުވީ އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފަކީ އަރާހުރި ޚާއިނެއް ކަމަށެވެ. ރައީސް ޔާމީން ވިދާޅުވީ، ވެރިކަން ބަދަލުވެގެން ދިޔަ ގޮތާއި އިންތިހާބު ބަދަލުވެގެން ދިޔަގޮތް ނޭނގޭނެ އެއްވެސް މުއައްސަސާއެއްގެ އިސް މީހަކު ނުހުންނާނެ ކަމަށްވެސް ރައީސް ޔާމީން ވިދާޅުވި އެވެ. އަދި ޕީޕީއެމް އަލުން ވެރިކަމަށް އަންނަ ދުވަހަކުން އެކަން ރައްޔޮތުންނަށް އެނގޭނެ ކަމަށް ވިދާޅުވި އެވެ. ރައްޔިތުންނަށް ނިކަމެތިކަން ގެނުވީ އަމާނާތެއް ހަވާލުކޮށް، ގާނޫނީ ހުވާ ކޮށްގެން ތިބި ބަޔަކު، އެމީހުންގެ ޒިންމާއިން އެއްކިބާވެ ތިބެގެން އަމިއްލަ ފައިދާއަށް ކުރި މަސައްކަތްތަކެއްގެ ސަބަބުން ކަމަށެވެ. އަދި ދިވެހި ރާއްޖެ އަޅުވެތިކަމަށް ދިއުމުގެ ސަބަބަކީ އެއީކަމަށް ވިދާޅުވި އެވެ.

އޭގެ އިތުރުން ޔާމީން ވިދާޅުވީ މިކަން ފެށުނީ 2018 ވަނަ އަހަރު ކަމަށެވެ. އަދި އޭރު ބޭއްވި ރިޔާސީ އިންތިހާބުގައި އެމަނިކުފާނު ބަލިނުކުރެވޭނެކަން ޔަގީންވި ހިސާބުން “ޗަރުކޭސް” ކުޅެން ފެށި ކަމަށާއި، އެކަމުގެ ހަގީގަތަކީ އެއީކަމަށް ވިދާޅުވި އެވެ.

މިވާހަކަތަކާ ގުޅިގެން ޝަރީފްވަނީ ޓުވިޓަރގައި އެކަމާ ގުޅިގެން ނުރުހުން ފާޅު ކުރައްވާފަ އެވެ.

ޝަރީފް ވިދާޅުވީ ރައްޔިތުން އެންމެންގެ ކުރިމަތީގައި ވޯޓުލާ ވޯޓު ގުނާ ސާފު ވޯޓަކުން ބަލިވީމާ ބަލި ގަބޫލުނުކޮށް ޕޯޑިއަމްތަކުގައި މާ ކޫލް ކަމެއްކަމަށް ވާހަކަ ދެއްކުމަކީ ރައީސްކަން ކޮށްފައި ހުންނަ މީހަކު ކުރަން އެހާ ރީތި ކަމެއް ނޫން ކަމަށެވެ. އަދި ސުޕްރީމް ކޯޓުގެ ތިން ފަނޑިޔާރުން ނެރެފައިވާ ހުކުމެއް ތަންފީޒު ނުކުރުމަކީ ރައީސް ޔާމީންގެ ނަޒާހަހްތެރިކަން ގެއްލިފައިވާ ކަމެއް ކަމަށް ވިދާޅުވެ ޝަރީފްވަނީ ރައީސް ޔާމީނަށް ވަރަށް ބޮޑަށް ފާޑު ކިޔާފަ އެވެ.