ހުސްވެފައިވާ އެންޓި ކޮރަޕްޝަން ކޮމިޝަން ގެ މެންބަރު ކަމަށް އައްޔަން ކުރަން ރައީސް އިބްރާހިމް މުހައްމަދު ސޯލިހު ހުށަހެޅުއްވި ފަސް ބޭފުޅުންނަށް ރައްޔިތުންގެ މަޖިލީހުން މިއަދު ރުހުން ދީފި އެވެ.

އެ ނަންތައް މިއަދު މަޖިލީހުގެ ތަޅުމުން ފާސްކުރީ މެމްބަރުންގެ އަޣުލަބިއްޔަތުން ނެވެ. އެ ބޭފުޅުން އައްޔަނުކުރަން ނުފެންނަކަމަށް އެއްވެސް މެމްބަރަކު ވޯޓެއް ނުދެއްވަ އެވެ.

އޭސީސީއަށް މަޖިލީހުން ރުހުން ދެއްވި 5 މެމްބަރުންނަކީ

  • އާދަމް ޝާމިލް، ރަތްވިލާގެ، ތ. ވިލުފުށި
  • އަބްދުއް ސަލާމް، ހަވާ، ށ. ނަރުދޫ
  • ތޯހާ މުހައްމަދު، ކަޅި ހާރުގެ، އދ. މާމިނިގިލި
  • ޝަޒްނާ ހާޝިމް، ރިހިވިލު، ހދ. ނޮޅިވަރަންފަރު
  • ޝިޔާމާ މުހައްމަދު، ނާރެސް، ރ. ހުޅުދުއްފާރު އެވެ.

އޭސީސީއަށް މެމްބަރުން އައްޔަން ކުރަން ކޮމެޓީން ފާސްކޮށްފައިވަނީ، އޭސީސީގައި ތިއްބެވި ފަސް މެންބަރުން މަގާމުން އިސްތިއުފާދެއްވުމާއި ގުޅިގެންނެވެ. ޖުމްލަ 5 މެންބަރުން ހިމެނިވަޑައިގަންނަވާ އޭސީސީގެ މެންބަރުންގެ އިތުބާރު ނެތްކަމަށް މަޖިލީހުން ވޯޓް ނަގަން ތައްޔާރުވެފައިވަނިކޮށް ހުރިހާ މެންބަރުން ވަނީ އިސްތިއުފާދެއްވާފަ އެވެ. އަދި އެއަށްފަހު އެ ކޮމިޝަން މިހާތަނަށް އޮތީ ގާނޫނީ ހުސްކަމެއްގެ ތެރޭގަ އެވެ.