ޑިޕްލޮމެޓް އޮފް ދި ޔިއާ ފްރޮމް އޭޝިއާ އެންޑް އޯޝޭނިއާ ގެ އެވޯޑް އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ. ފަރަހަނާޒް ފައިޒަލް އަށް ލިބިވަޑައިގެންފި އެވެ.

މި އެވޯޑް އެކަމަނާ އާ ހަވާލުކުރައްވާފައިވަނީ އިއްޔެ ބޭއްވި އައިއެޗްޖީ ޑިޕްލޮމެޓު އޮފް ދަ އިޔާ އެވޯޑްސް ހަފްލާގަ އެވެ.

ޑިޕްލޮމެޓް އޮފް ދަ އިޔާ އެވޯޑަކީ އިނގިރޭސިވިލާތުގައި ގާއިމުކޮށްފައިވާ 165 އަށްވުރެ ގިނަ ޑިޕްލޮމެޓިކް މިޝަންގެ ޑިޕްލޮމެޓުންގެ ތެރެއިން ވޯޓިލައިގެން ދޭ ވަރަށް ޝަރަފުވެރި އެވޯޑެކެވެ.

މިއެވޯޑް ދޭތާ ބާރަ އަހަރުވެފައިވާއިރު ކޮންމެ އަހަރަކުވެސް މި އެވޯޑު ދިހަ ބޭފުޅަކަށްދެ އެވެ.

އޭޝިއާ އަދި އޯޝޭނިއާ އަކީ ގިނަ ޤައުމުތަކެއް ކަވަރުކުރާ ބޮޑު ސަރަހައްދަކަށްވާއިރު އެ ގައުމުތަކުގެ ޑިޕްލޮމެޓުންގެ ތެރެއިން ޑރ. ފަރަހަނާޒް ފައިޒަލް އަށް މި އެވޯޑް ލިބިވަޑައިގަތުމަކީ ދިވެހިރާއްޖެއަށް ލިބުނު ވަރަށްބޮޑު ޝަރަފެކެވެ.

މި އެވޯޑް ޙަފްލާ އިންތިޒާމުކުރައްވާފައިވަނީ "ޑިޕްލޮމެޓް މެގަޒިން" ގެ ފަރާތުންނެވެ.

"ޑިޕްލޮމެޓް މެގަޒިން" އަކީ ހާރިޖީ ދާއިރާ އާ ގުޅުންހުރި މުހިންމު މައުލޫމާތުތަކާއި ވާހކަތައް ޝާއިއުކުރާ މަސްހޫރު މަޖައްލާއެކެވެ.

މިއަހަރުގެ އެވޯޑު ހަފްލާ ހުށަހަޅުއްވައިދެއްވާފައިވަނީ ބީބީސީ ނިއުސްގެ ޑިޕްލޮމެޓިކް ކޮރެސްޕޮންޑެންޓް މރ. ޖޭމްސް ލެންޑޭލް އެވެ.

މި އެވޯޑާއި ހަވާލުވެވަޑައިގަތުމަށްފަހު ޑރ. ފަރަހަނާޒް ފައިޒަލް ދެއްކެވި ވާހަކަފުޅުގައި އެކަމަނާ ވަނީ އެވޯޑް ލިބިވަޑައިގެންނެވި ކަމަށްޓަކައި މާތްﷲ ގެ ހަޟްރަތަށް ހަމްދުކުރައްވައި އިނގިރޭސިވިލާތުގައި ހުންނަ ދިވެހިރާއްޖޭގެ ސަފީރުގެ މަގާމުގައި ހުންނަވައިގެން ރާއްޖެއަށް ހިދުމަތް ކުރެއްވުމުގެ ފުރުޞަތު އެކަމަނާއަށް ދެއްވިކަމަށްޓަކައި ރައީސް ސޯލިހަށް ޝުކުރު އަދާކުރައްވާފަ އެވެ.

އަދި ހަމައެއާއެކު ފޮރިން މިނިސްޓަރު އަބްދުﷲ ޝާހިދު އާއި އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަންގައި މަސައްކަތްކުރައްވާ ޓީމަށް ވަރަށް ހާއްސަ ޝުކުރެއް އެކަމަނާ ރައްދުކުރެއްވި އެވެ.

ފަރުހަނާޒަށް މިއެވޯޑް ލިބުމުން ރައީސް ސޯލިހާއި ފޮރިން މިނިސްޓަރު ޝާހިދު ވަނީ މަރުހަބާ ދަންނަވާފަ އެވެ.

ޑރ. ފަރަހަނާޒް ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް އިނގިރޭސިވިލާތުގެ ސަފީރުކަމުގެ މަގާމު އަދާކުރައްވައިފަ އެވެ. އެ މަގާމަށް އޭނާ ދެވަނަ ފަހަރަށް އައްޔަން ކުރެއްވީ ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.