އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ކެނޭޑިއަން ސްޕޭސް އެޖެންސީގެ ޖޫނިއަ އެސްޓްރޮނޯޓް ޕްރޮގްރާމް މިއަދު ރާއްޖެއަށް ތައާރަފް ކޮށްފި އެވެ.

މިއީ މިފަދަ ޕްރޮގްރާމެއް ރާއްޖެއަށް ތައާރަފްކުރި ފުތަރަމަ ފަހަރެވެ.

ރާއްޖޭގެ ފުރަތަމަ ސްޕޭސް ޕްރޮގްރާމްގެ ދަށުން އައިޖީއެސް އިން ތައާރަފްކުރި މި ޕްރޮގްރާމް ކުރިއަށް ދާނީ ޑިސެމްބަރު މަހުގެ ހަޔަކުން އަންނަ އަހަރުގެ ޖެނުއަރީ ހަތެއްގެ ނިޔަލަށެވެ. ގްރޭޑް 7 ން 9 ގެ ދަރިވަރުން ނަށް ބައިވެރި ވެވޭ މި ޕްރޮގްރާމް ފުރިހަމަ ކުރާ ދަރިވަރުންނަށް ކެނޭޑިއަން ސްޕޭސް އެޖެންސީގެ ސެޓްފިކެޓް ލިބޭނެ އެވެ. އައިޖީއެސް ގެ ފޭސްބުކް ޕޭޖް igsmaldives@ މެދުވެރިކޮށް މި ޕްރޮގްރާމް ގައި ބައިވެރިވާން މިހާރު ވަނީ ހުޅުވާލާފަ އެވެ.

ޖުނިއާ އެސްޓްރޮނޯޓު ޕްރޮގްރާމް ތަރާފްކުރުމާ ބެހޭ ގޮތުން އައިޖީއެސްގެ ޗެއާމަން ރިފްއަތު މުހައްމަދު މިއަދު ނޫސްވެރިންނަށް މައުލޫމާތު ދެއްވަނީ

މި ޕްރޮގްރާމް ތައާރަފް ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި އައިޖީއެސް ގެ ޗެއާމަން އަދި ސީއީއޯ ރިފްއަތު މުހައްމަދު ވިދާޅުވީ މިއީ އެސްޓްރޮނޯޓަކަށް ވާން ބޭނުން ދަރިވަރުންގެ އިތުރުން ސްޕޭސް އާއި ސައިންސްގެ ރޮނގުން ކުރިއަށްދާން ބޭނުން ދަރިވަރުންނަށް ފަރުމާ ކޮށްފައިވާ ޕްރޮގްރާމެއް ކަމަށެވެ.

"މި ކޯހުގައި ކިޔަވައިދޭނީ 21 ވަނަ ގަރުނުގެ ހުނަރުތައް،" ރިފްއަތު ވިދާޅުވި އެވެ.

"އެސްޓްރޮނޯޓަކަށް ވުމަކީ ރާއްޖޭގެ ވަރަށް ގިނަ ކުދިންގެ އުއްމީދެއް. އަޅުގަނޑުމެން ގެ މަސައްކަތަކީ އެ ކުދިންށަށް ފުރުސަތުތައް ހޯދައިދީ އެކަން ކުރެވޭނެކަން ވިސްނައިދިނުން. މި ޕްރޮގްރާމް ފުރިހަމަ ކުރާ ދަރިވަރުންނަށް ނާސާގައި އިތުރު ތަމްރީނު ހެދުމުގެ ފުރުސަތު ލިބޭނެ. އޭގެ ތެރޭގައި ޒީރޯ ގްރެވިޓީގައި ޓާސްކްތައް ފުރިހަމަ ކުރުމުގެ އަމަލީ ތަޖުރިބާ ހޯދުންވެސް ހިމެނޭ. އެހިސާބުން ކުދިންނަށް އިތުރު ޔަގީންކަމެއް ލިބިގެންދާނެ މި ރޮނގުން ކުރިއަށް ދެވޭނެކަން،" އދ ގެ އާއްމު މަޖިލީހުން ފާސްކޮށްގެން ފާހަގަކުރާ ދުނިޔޭގެ އެންމެ ބޮޑު ސްޕޭސް އިވެންޓް "ވޯލްޑް ސްޕޭސް ވީކް" ގެ ނެޝަނަލް ކޯޑިނޭޓަރު ކަން ވެސް ކުރައްވާ ރިފްއަތު ވިދާޅުވިއެވެ.

އައިޖީއެސް އިން ވަނީ ރާއްޖޭގެ ފުރަތަމަ ސްޕޭސް ޕްރޮގްރާމް އިފްތިތާހުކޮށް، ފުރަތަމަ ޕްރޮޖެކްޓް އަންނަ އަހަރު ފަށާނެކަން އިއުލާނު ކޮށްފަ އެވެ.

އައިޖީއެސް އަކީ ތަފާތު ދައްކުވައިދޭނެ ލީޑަރުން ބިނާކުރަން މަސައްކަތްކުރާ އިންސްޓިޓިއުޝަން އެކެވެ. އެގޮތުން ދުނިޔޭގެ ކުރިއަރާފައިވާ ގައުމުތަކުގައި މުސްތަގުބަލުގެ ލީޑަރުން ބިނާ ކުރުމަށް ހިންގާ ގިނަ ޕްރްގްރާމްތަކެއް ރާއްޖެއަށް ތައާރަފް ކުރަން އައިޖީއެސް އިންވަނީ ނިންމާ ފައެވެ.