ކޮވިޑާ ގުޅުވާ އަނެއްކާވެސް ވަޒީފާގެ ކުރިއެރުން ނުލިބުނު މުވައްޒަފަކަށް ވަޒީފާގެ ކުރިއެރުން ދޭން ވަޒީފާއާ ބެހޭ ޓްރައިބިއުނަލްއިން އަންގައިފި އެވެ.

މި މައްސަލައަކީ، މިނިސްޓްރީ އޮފް ހެލްތްގައި މަސައްކަތްކުރައްވާ، ލީގަލް އޮފިސަރު އިސްމާޢީލް ޒާހިރަށް، ސިވިލް ސާވިސް ލީގަލް އޮފިސަރުންގެ ވަޒީފާގެ އޮނިގަނޑުގައި ކަނޑައަޅާފައިވާ ޝަރުތުހަމަވުމާއެކު ވެސް، އެ މުއްދަތުތަކަށް ލިބެންޖެހޭ މުސާރައާއި، އިނާޔަތްތަކާއި، އެ މުއްދަތައް ލިބެންޖެހޭ އިތުރު ގަޑީގެ ފައިސާ ހޯދުމަށް އެދި ވަޒީފާއާ ބެހޭ ޓްރައިބިއުނަލަށް ހުށަހަޅާފައިވާ މައްސަލައެކެވެ.

އެގޮތުން، 2017، 2019 އަދި މިދިޔަ އަހަރާ ހަމައަށް ވިދިވިދިގެން ދެ އަހަރު ދުވަހު މަސައްކަތްކޮށް، މަސައްކަތުގެ ފެންވަރު ބެލުމުގެ ނިޒާމުން 85 ޕަސެންޓަށް ވުރެ މަތިން ހޯދާފައިވީނަމަވެސް، ސިވިލް ސާވިސް ލީގަލް އޮފިސަރުންގެ ވަޒީފާގެ އޮނިގަނޑުގައި ކަނޑައަޅާފައިވާ ގޮތަށް މި މުއްދަތަށް އޭނާއަށް ލިބެންޖެހޭ ތިން ޕްރޮމޯޝަނެއް ދީފައިނުވެއެވެ.

މި މައްސަލައިގާ، މައްސަލަ ރައްދުވި ސިވިލް ސާވިސް ކޮމިޝަނުން މައްސަލައަށް އިންކާރުކޮށްފައިވާ އިރު، ކޮމިޝަނުގެ މައްޗަށް އަމުރުކުރާނެ ގާނޫނީ ހަމައެއް ނެތްކަމަށް ކަނޑައަޅާ ދިނުމަށް އެކޮމިޝަނުން އެދިފައިވެ އެވެ. އެގޮތުން، މުސާރައަށް ނުވަތަ އެއްވެސް އެލަވަންސަކަށް އެއްވެސް ބަދަލެއް އަންނަނަމަ، އެ ބަދަލެއް ގެނެވޭނީ ފިނޭންސް މިނިސްޓްރީއަށް އެންގުމަށްފަހު ކަމަށް އެ ކޮމިޝަނުން ބުނެފައިވެ އެވެ.

މީގެއިތުރުން މުސާރައާއި ކުރިއެރުން ދިނުމުގެ ކުރިން މާލީ ޒިންމާދާރުވެރިޔާއާ މަޝްވަރާކޮށް، ބަޖެޓުގައި އެ ފައިސާ ހުރިކަން ކަށަވަރު ކުރަންޖެހޭނެ ކަމާއި، އެދުވަސް ވަރަކީ ކޮވިޑް-19 ގެ ޕެންޑެމިކް ހާލާތާ ގުޅިގެން ދައުލަތުގެ ޚަރަދު ކުޑަކުރުމުން ދިޔަ ދުވަސްވަރަކަށް ވެފައި، މުވައްޒަފުންނަށް އެހާތަނަށް ދޭންފަށާފައި ނުވާ އެއްވެސް އެލަވަންސެއް ނުދިނުމަށް ފިނޭންސް މިނިސްޓްރީން އަންގާފައިވާ ކަން އެކޮމިޝަނުން ފާހަގަކޮށްފައިވެއެވެ.

އޭގެ އިތުރުން، 2020 ވަނަ އަހަރު ރައީސުލްޖުމްހޫރިއްޔާގެ އޮފީހުންވެސް، މުވައްޒަފުންނަށް މަޤާމާއި ކުރިއެރުން ދިނުމާއި އިތުރު އެލަވަންސް ދިނުން ވަގުތީ ގޮތުން މަޑުޖައްސާލުމުގެ ހުއްދަ ފިނޭންސް މިނިސްޓްރީއަށް ދީފައިވާނެ ކަމަށް އެ ކޮމިޝަނުން ފާހަގަކޮށްފައިވެއެވެ.

މީގެ އިތުރުން، މި މައްސަލައިގާ، މަޤާމާއި މުސާރައިގެ ކުރިއެރުމާއި އެލަވަންސްތައް ދިނުން މަޑުޖައްސާލާއިފައިވަނީ ހަމައެކަނި އިސްމާޢީލް ޒާހިރަށް ނޫންކަމަށް ކޮމިޝަނުން ބުންޏެވެ. އެގޮތަށް މަޤާމާއި މުސާރައިގެ ކުރިއެރުމާއި އެލަވަންސްތައް ދިނުން މަޑުޖައްސާލާފައިވާ ސިވިލް ސާވިސްގެ ޚާއްޞަ އޮނިގަނޑުގައި ތިބި އެތަކެއް މުވައްޒަފުންނެއް އިސްމާޢީލް ޒާހިރާ އެއް ޙާލަތެއްގައި ތިބިކަމާއި، މިއީ ސިވިލް ސާވިސްގެ ގިނަ އަދަދެއްގެ މުވައްޒަފުންގެ މަސްލަހަތު ހިމެނޭ ކަމެއް ކަމަށްވާއިރު، އޭނާ އެދިފައިވާ ގޮތަށް އަމުރު ކޮށްފިނަމަ، އެނިންމުމަކީ އެ ކޮމިޝަނަށް ތަންފީޒުކުރުވޭނެ ފަދަ ނިންމުމެއް ނޫންކަމަށާއި، އޭގެ ސަބަބުން އަންދާޒާ ނުކުރެވޭފަދަ ގޮންޖެހުންތަކެއް ކުރިމަތިވުން ގާތްކަމަށް ކޮމިޝަނުން ބުނެފައިވެއެވެ.

މި މައްސަލައިގާ، ވަޒީފާއާ ބެހޭ ޓްރައިބުއުނަލަށް ހުށަހަޅާފައިވާ އެންމެހައި ކަންކަމަށް ރިޢާޔަތްކޮށް، އިސްމާޢީލް ޒާހިރު އެދިފައިވާ ގޮތަށް، 2017، 2019 އަދި މިދިޔަ އަހަރުން ފެށިގެން އޭނާއަށް ލިބެންޖެހޭ ކުރިއެރުމާއި، އެކުރިއެރުންތަކާއެކު އޭނާގެ މުސާރައަށް އަންނަ ބަދަލާ ގުޅިގެން އެނާގެ މުސާރައާއި ސްޕެޝަލް ޑިއުޓީ އެލަވަންސާއި އިތުރުގަޑީގެ ފައިސާއިން އުނިވެފައިވާ ފައިސާ ނަގައިދިނުމަށް ކަނޑައަޅާ، އެ ފައިސާ ރަސްމީ ބަންދު ނޫން 30 ދުވަހުގެ ތެރޭގައި އޭނާއަށް ދިނުމަށް ސިވިލް ސާވިސް ކޮމިޝަނުގެ މައްޗަށް އަންގައި ޓްރައިބިއުނަލުން ވަނީ އަމުރުކޮށްފަ އެވެ.