ސަރުކާރުން މި އަހަރުގެ މިހާތަނަށް ދަތުރުތަކަށް 12 މިލިއަން ރުފިޔާ ޚަރަދުކޮށްފި އެވެ.

ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި މިއަހަރުގެ ފުރަތަމަ ދުވަހުން ފެށިގެން ފެބްރުއަރީ މަހުގެ ދެވަނަ ދުވަހާ ހަމައަށް ސަރުކާރުގެ ދަތުރުތަކަށް 12 މިލިއަން ރުފިޔާ ވަނީ ހަރަދުކޮށްފަ އެވެ.

މިދިޔަ އަހަރުގެ މި މުއްދަތުގައި ސަރުކާރުން ކުރި ދަތުރުތަކަށް 8.3 މިލިއަން ރުފިޔާ ހަރަދުކޮށްފައިވެ އެވެ. އެއާއެކު ސަރުކާރުން މިއަހަރު ދަތުރުތަކަށް ކުރި ހަރަދުގެ އަދަދު ވަނީ 3.5 މިލިއަން ރުފިޔާއިން އިތުރުވެފަ އެވެ.

ސަރުކާރުން ދަތުރުތަކަށް ކުރަމުން އަންނަ ހަރަދުތައް ދުވަހެއް ދުވަހަކަށް އިތުރުވަމުންދާއިރު، 2022 ވަނަ އަހަރު ނިމުނު އިރު އެކަނިވެސް 235 މިލިއަން ރުފިޔާ ހަރަދުކޮށްފައިވެ އެވެ. އަދި 2021 ވަނަ އަހަރު ނިމުނު އިރު ދަތުރުތަކަށް ސަރުކާރުން 158.4 މިލިއަން ރުފިޔާ ހަރަދުކޮށްފައިވެ އެވެ.

ސަރުކާރުން މި އަހަރު ދަތުރުތަކަށް މުޅި ޖުމްލަ ބަޖެޓުކޮށްފައި ވަނީ 210.2 މިލިއަން ރުފިޔާ އެވެ.