ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުން ދިނުމުގެ މައްސަލަ "ޕާކް" ކުރުމަށް ފަހުގައި ރައްޔިތުންގެ މަޖިލިހުގެ މެމްބަރުން ދެ މަސް ދުވަހުގެ ޗުއްޓީއަކަށް ވަޑައިގަންނަވަން އުޅުއްވާ ކަން "ހުރިހާ" އަށް ކަށަވަރުވެއްޖެ އެވެ.

ރައީސް މުއިއްޒުގެ ސަރުކާރުގައި ހިމެނިވަޑައިގަންނަވާ 22 ވަޒީރުންނަށް ރުހުން ދިނުމުގެ މައްސަލަ މަޖިލިހަށް ފޮނުވާފައި ވަނީ މިދިޔަ މަހުގެ 19 ގަ އެވެ. އެ މައްސަލަ މަޖިލިހުގައި އޮންނަތާ މިހާރު މަހަކަށް ވުރެ ގިނަ ދުވަސް ވަނީ ވެފަ އެވެ.

ވަޒީރުންގެ ނަންތައް ދިރާސާކުރި މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން ފުރަތަމަ ނިންމާފައި ވަނީ ހުރިހާ ބޭފުޅުންގެ ވެސް ވަޒީރުކަމުގެ ޝަރުތު ހަމަވާ ކަމަށެވެ. އެކަމަކު، އެ ބޭފުޅުންނަށް ރުހުން ދިނުމަށް މަޖިލީހުގެ ތަޅުމުގައި ނަގާ ވޯޓުގައި ކޮންމެ ބޭފުޅަަކަށް ވަކިވަކިން ވޯޓަށް އަހަން ކޮމިޓީން ވަނީ ނިންމައިފަ އެވެ.

ކޮމިޓީގެ ރިޕޯޓު މިދިޔަ ހަފްތާގައި މަޖިލިހަށް ހުށަހެޅި ނަމަވެސް މިނިސްޓްރީތަކުގެ މެންޑޭޓަށް މި ސަރުކާރުން ގެނައި ބަދަލުތައް ރައީސް އޮފީހުން މަޖިލީހަށް ފޮނުވާފައި ނުވާތީ ރިޔާސަތުން ވަނީ އެ މައްސަލަ އަނބުރާ ކޮމިޓީ އަށް ފޮނުވާލައިފަ އެވެ. އެ މައްސަލަ އަނބުރާ ކޮމިޓީ އަށް ފޮނުވާލި ފަހުން، ރައީސް އޮފީހުން ވަނީ މެންޑޭޓް ފާސް ކުރުމަށް މަޖިލިހަށް ފޮނުވައިފަ އެވެ.

ވަޒީރުންނަށް ރުހުން ދިނުމުގެ މައްސަލައިގައި މިދިޔަ ހޮނިހިރު ދުވަހު ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުމެއް ބާއްވަން ނިންމި އެވެ. އެކަމަކު، ކޯރަމް ހަމަނުވެގެން އެ ބައްދަލުވުން ބޭއްވޭ ގޮތެއް ނުވި އެވެ. އޭގެ ފަހުން މިއަދާ ހަމައަށް އެ ކޮމިޓީގެ ބައްދަލުވުމެއް ބާއްވަން ނިންމާފައެއް ނުވެ އެވެ.

މިނިސްޓަރުންނަށް ރުހުން ދިނުމުގެ މަސައްކަތް ކޮމިޓީ މަރުހަލާގައި އޮތް އިރު މަޖިލިހުން އެންމެ ފަހުން ނިންމާފައި އޮތީ މާދަމާގެ ނިޔަލަށް މަޖިލިހުގެ ތިން ވަނަ ދައުރު ދަންމާލުމަށެވެ. އެކަމަކު، މިއަދު ވެސް ކޮމިޓީގެ ބައްދަލުވުމެއް ނެތުމުން މާދަމާ ބާއްވާ މި އަހަރުގެ ފަހު ދައުރުގެ އެންމެ ފަހުގެ ޖަލްސާ އަށް ވަޒީރުންގެ ރުހުން ދިނުމުގެ މައްސަލަ ތާވަލެއް ނުކުރެވޭނެ އެވެ.

އެހެންވެ، އެ މައްސަލައިގައި ދެން ގޮތެއް ނިންމަން ޖެހޭނީ ދެ މަސް ފަހުންނެވެ. މަޖިލިހުގެ މެމްބަރުން މާދަމާ އިން ފެށިގެން ދެ މަސް ދުވަހުގެ ޗުއްޓީއަކަށް ވަޑައިގަންނަވާ އިރު، ޖަލްސާތައް ދެން ފަށާނީ އަންނަ ފެބްރުއަރީ މަހުގެ ފުރަތަމަ ހަފްތާގެ ތެރޭގަ އެވެ.

މި ސަރުކާރުގެ ވަޒީރުންނަށް ރުހުން ނުދެވި ގިނަ ދުވަސްތަކެއްވާ މައްސަލައިގައި މަޖިލިހުގެ ބައެއް މެމްބަރުން ވަނީ ކަންބޮޑުވުން ފާޅުކުރައްވައިފަ އެވެ. އަދި އެމްޑީޕީގެ ބައެއް މެމްބަރުން ވަނީ މި ސަރުކާރުގެ ބައެއް ވަޒީރުންނަށް ރުހުން ނުދެއްވާނެ ކަމަށް ވެސް ވިދާޅުވެފަ އެވެ.