ނަސީރުއްދީން ޝާހަކީ ބޮލީވުޑްގައި އެންމެ ގިނަ ދުވަސްވީ، އަދި މުޅި ބޮލީވުޑުގައި ވެސް އެންމެ މަތީ ފަންތީގައި ގުނާލެވޭ ވަރުގެ އެކްޓަރެކެވެ.

މީގެ ދެ ދުވަސް ކުރިން 71 އަހަރު ފުރުނު ނަސީރުއްދީން ޝާހު، އެކްޓިންގެ ދާއިރާއަށް ނިކުތުމުގެ ކުރިން ދާދި ފަހުން މަރުވި ދިލިޕް ކުމާރާއި އޭނާއާއި ދެމެދު ދެކެވުނު ވާހަކައެއް މިވަނީ ހިއްސާކޮށްފަ އެވެ.

އިންޑިއާގެ ލިޔުންތެރިއެއް ކަމަށްވާ، ސައިފް މަހްމޫދާއި "ބިޔޯންޑް ލޯ"ގެ ތެރެއިން ހިއްސާކުރި ވާހަކަތަކުގެ ތެރޭގައި ނަސީރުއްދީން ބުނެފައިވަނީ، ދިލިޕް ގާތު އޭނާ ވަރަށް ޒުވާން ދުވަސްވަރުގައި އެކްޓްކުރަން ޝައުގުވެރިކަން ހުރިކަން ފާޅުކުރި ކަމަށާއި، ނަމަވެސް ދިލިޕް އެކަމާ ދެކޮޅު ހެދި ކަމަށެވެ.

"އަހަރެންނަށް ހީވަނީ، ނަސީރު އަދި ވިސްނަންވީ ކިޔެވުމާ ދޭތެރޭހެން. ރަނގަޅު އާއިލާއަކަށް ނިސްބަތްވާ ކުއްޖަކު އެކްޓިންގެ ދާއިރާއަށް ނިކުންނަން ނޫޅުން އެއީ ބުއްދިވެރި ގޮތެއް،" ދިލިޕް ކުމާރު، ނަސީރުއްދީން ކައިރީ މިހެން ބުނެފައިވެ އެވެ.

ނަސީރުއްދީން ބުނީ އޭނާ ދިލިޕް ގާތު އެކްޓިން ދާއިރާއަށް ވަން ގޮތެއް ނާހާ ކަމަށާއި، އަދި ދިލިޕް އެހެން ބުނުމާއެކު އިތުރަށް އެއްވެސް ސުވާލެއް ނުކުރާ ކަމަށެވެ. ސަބަބަކީ ދިލިޕް ކުމާރަކީ އެންމެން ވެސް ވަރަށް އިޙްތިރާމްކުރާ މީހަކަށްވާތީއާއެކު، އޭނާއަށް އިތުރު ސުވާލެއް ކުރަން ނުކެރުނީ ކަމަށް އޭނާ ބުންޏެވެ.

ނަމަވެސް ކަންދިމާކުރި ގޮތުން ނަސީރުއްދީން އެކްޓިންގެ ދާއިރާއަށް ވަދެ، އޭނާ ވަނީ ދިލިޕް ކުމާރާއެކު އެއް ފިލްމަކުން ފެނިފައިވެ އެވެ. އެއީ 1986ގައި ނިކުތް ސުބާޝް ގާއީގެ ފިލްމް "ކަރްމާ" އިންނެވެ.

"އަހަރެންނަށް ހީވަނީ، އެއީ ކަންނޭންގެ އަހަރެންގެ މުޅި އެކްޓިން ހަޔާތުގައި ވެސް، އެކްޓް ކުރަން އެންމެ ޖެހިލުންވި ފިލްމަކީ. އެކަމަކު އަހަރެންނަށް ދިލިޕް ކުމާރާއެކު ފިލްމެއްގައި މަސައްކަތް ކޮށްލަން ލިބުނީތީ އަބަދުވެސް އުފާކުރަން،" ނަސީރުއްދީން ބުންޏެވެ.