ކ. އޮޅުވެލި ރިސޯޓު ކައިރިން އިއްޔެ ދަތުރުކުރި ލޯންޗަކަށް ރާޅުއަރައި ހިނގި ހާދިސާގައި ކަނޑަށްވެއްޓި މަރުވި މަރިޔަމް ނާހިދާގެ ޖަނާޒާ ބާއްވައިފި އެވެ.

ނާހިދާގެ ޖަނާޒާ ބައްވާފައި ވަނީ މިއަދު އަސްރު ނަމާދަށް ފަހު އާސަހަރާ މިސްކިތުގަ އެވެ.

ނާހިދާގެ މޫނު ދެކިލުމަށް ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް ވެސް ވަޑައިގެންނެވި އެވެ.

ނާހިދާގެ ހަށިގަނޑު މިއަދު ހެނދުނު 7:30 ހާއިރު މާލެ ގެނެސްފައި ވާއިރު އޭނާ މާލެ ގެނައީ ލޯންޗު ހާދިސާގައި އޭނާ ކަނޑަށް ވެއްޓި މަރުވުމުން ކ. ގުރައިދޫ ސިއްހީ މަރުކަޒަށް ގެންގޮސް އެތަނުގައި ބޭއްވުމަށް ފަހު އެވެ.

މާލެއިން ވ. ފުލިދޫއަށް ކުރި ދަތުރުގައި، އެ ލޯންޗަށް ޖެހި ރާޅަކާއެކު ކަނޑަށް ފުރަތަމަ ވިއްސައިގެން ދިޔައީ ނާހިދާއާއި އޭނާގެ ހަގު ދަރިފުޅެވެ. މި ހާދިސާގައި ކަނޑަށް ގެއްލުނު ނާހިދާގެ އުމުރުން ހަތަރު އަހަރުގެ ކުޑަ ދަރިފުޅު އަދިވެސް ނުފެނެ އެވެ.

މި ހާދިސާގައި ގެއްލިގެން ހޯދާ ކުޑަ ކުއްޖާ ހޯދުމުގެ މަސައްކަތް އަދިވެސް އެމްއެންޑީއެފުން ކުރަމުން ގެންދާ ކަމަށާއި، އެކަމަށްޓަކައި ރޭގައި އާންމުންގެ އެހީތެރިކަމަށް ވެސް އެދިފައިވާ ކަމަށް އެމްއެންޑީއެފުން ވަނީ ބުނެފަ އެވެ.