ޑޮކްޓަރު ލިޔެފައިދޭ ބޭސް ސިޓީގައި އޮންނަ ބްރޭންޑުގެ ބޭސް ފިޔަވައި އެހެން ބްރޭންޑެއްގެ ބޭހެއް އާސަންދައިން ނުލިބޭނެގޮތް ހަދަން ނިންމައިފި އެވެ.

އާސަންދަ ކުންފުނިން، އާސަންދައިގެ ހިދުމަތްދޭ މަރުކަޒުތަކަށް ފޮނުއްވި ސާކިއުލާއެއްގައި ބުނެފައިވަނީ، އާސަންދަ ސްކީމްގެ ތެރެއިން ޑޮކްޓަރުން ބޭސް ލިޔެދެއްވާއިރު ބަލި މީހާއަށް ވަކި ބްރޭންޑެއްގެ ބޭހެއް ދޫކުރަން ބޭނުންނަމަ، ބޭހުގެ އިންސްޓަރްކްޝަންގައި އެ ބޭހެއް ސަބްސްޓިޓިއުޓް ނުކުރަން އެދޭކަން ލިޔަން ޖެހޭނެ ކަމަށެވެ. މިފަދައިން ވަކި ބޭހެއް މެނުވީ ބަލި މީހާއަށް ދޫނުކުރުމަށް ޑޮކްޓަރު އެދޭ ހާލަތުގައި، ބޭސް ފިހާރައިން އެނޫން ބޭހެއް ބަލިމީހާއަށް ދޫކޮށްގެން ނުވާނެކަމަށް ވެސް އެ ސާކިއުލާގައި ވަނީ ބުނެފަ އެވެ.

ހިދުމަތަށް އެދި އެ މީހަކު ދާ ބޭސް ފިހާރަގައި އެ ބޭހެއް ސްކީމުގެ ތެރެއިން ދޫނުކުރެވޭނަމަ އެކަން ބަލި މީހާއަށް އޮޅުން ފިލުވައިދޭން ވެސް ޖެހެ އެވެ.

ބޭހުގެ އިންސްޓަރްކްޝަންގައި ވަކި ބްރޭންޑެއްގެ ބޭހެއް ދޫކުރުމަށް ޑޮކްޓަރު ނުލިޔުއްވާނަމަ ބޭސް ފިހާރައިން ބިލް ކުރަންވާނީ ބޭސް ފިހާރައިން ބަލިމީހާއަށް ދޫކުރި ބްރެންޑަށް ކަމަށެވެ. އެ ބްރޭންޑުގެ ބޭސް އެއްވެސް ފިހާރައަކުން އެވަގުތު ލިބެން ނެތްނަމަ އެ ބްރޭންޑު ބަދަލުކުރުމަށް ބަލިމީހާ ޑޮކްޓަރު ކައިރީގައި އެދެންވާނެކަމަށް ބުނެފައިވެ އެވެ.

ވަކި ބްރޭންޑެއް ދޫކުރުމަށް ޑޮކްޓަރު އެދޭ ހާލަތުގައި ބޭސް ފިހާރައިން އެނޫން ބޭހެއް ދޫކޮށްފިނަމަ މިމަހުގެ 17 އިން ފެށިގެން ރިޖެކްޓު ކުރާނެ ކަމަށް ވެސް އާސަންދައިން ބުންޏެވެ.