މޯލްޑިވްސް ހަލާލް ޓްރެވަލް ބްރޭންޑުގެ ދަށުން ޓްރެވަލް އެޖެންސީއެއް ހިންގާ އަދި ދާއިރާގެ ހަބަރުތައް ގެނެސްދޭ މީޑިއާތައް ހިންގާ ސަނީ އުމަރުގެ މައްޗަށް ކުރެވޭ ޖިންސީ ގޯނާގެ ތުހުމަތުގެ މައްސަލައެއް ފުލުހަށް ހުށަހަޅާފައި ނުވާ ކަމަށާއި ނަމަވެސް އެ މައްސަލަ ފުލުހުންގެ ސަމާލުކަމަށް އައުމުން މައްސަލަ ބަލަމުން އަންނަ ކަމަށް ފުލުހުން މިއަދު ބުނެފި އެވެ.

ސަނީ އުމަރަކީ ކުރީގެ މަޝްހޫރު ފުޓުބޯޅަ ކުޅުންތެރިޔާ އަލީ އުމަރުގެ ކޮއްކޮއެކެވެ.

އާއިލީ ކުދިންތަކަކަށް ޖިންސީ ގޯނާ ކުރިކަން ފަޅާއެރުމުން ސަނީ އުމަރު ރާއްޖެ ދޫކޮށް ފުރާފައިވާ ކަމަށް ވަނީ އަޑުފެތުރިފަ އެވެ. އޭނާ އިއްޔެ ފުރައިގެން ދިޔައީ އިންޑިއާގެ ނިއު ދިއްލީއަށް ކަމަށްވެ އެވެ.

އެ މައްސަލައާ ގުޅިގެން ފުލުހުން މިއަދު މީޑިއާއަށް ފޮނުވި މެސެޖެއްގައި ބުނީ އެފަދަ މައްސަލައެއް ފުލުހުންނަށް ހުށަހަޅާފައި ނުވާ ކަމަށެވެ. އެހެން ނަމަވެސް އެކަން ފުލުހުންގެ ސަމާލުކަމަށް މިހާރު އައިސްފައިވާ ކަމަށާއި އެކަމާ ގުޅިގެން ބަލަންޖެހޭ ކަންތައް މިހާރު ބަލަމުން އަންނަ ކަމަށް ފުލުހުން ވަނީ ބުނެފަ އެވެ.

ބައެއް މީޑިއާތަކުގައި ރިޕޯޓުކޮށްފައިވާ ގޮތުން، ސަނީ އުމަރު ވަނީ އޭނާގެ އަނބިމީހާގެ އާއިލާގެ ތިން ކުއްޖަކަށް ޖިންސީ ގޯނާކޮށްފަ އެވެ. އެގޮތުން އެއީ އަންހެން ދެ ކުއްޖަކާއި ފިރިހެން ކުއްޖެއް ކަމަށް ވެ އެވެ. އޭގެ ތެރެއިން އެއް އަންހެން ކުއްޖަކާއި ފިރިހެން ކުއްޖަކީ 18 އަހަރުން ދަށުގެ ދެ ކުދިން ކަމަށާއި އަނެއް އަންހެން ކުއްޖާއަށް ވެސް ޖިންސީ ގޯނާ ކުރީ އެ ކުއްޖާގެ އުމުރުން 18 އަހަރު ނުވަނީސް ކަމަށް ވަނީ މައުލޫމާތު ލިބިފައިވެ އެވެ.