މިއަދު އިރުއޮއްސުނުއިރު ކުޅިވަރު އެކުވެނި ކައިރިން ހިނގި ނުރައްކާތެރި އެކްސިޑެންޓްގެ ވީޑިއޯ ސޯޝަލް މީޑިއާގައި މިހާރު ވަނީ އާންމުވެފަ އެވެ. އެކްސިޑެންޓްވި "ކަމޭރޯ" ހައިސްޕީޑް ކާރު ދުއްވީ އެހާމެ ބާރު ސްޕީޑްގައިކަން އެ ވީޑިއޯއިން ހާމަވެ އެވެ.

މާލެއަށް ވެހުނު ބޯ ވާރޭގައި އެ ރަތްކާރު ކޮންޓްރޯލުން ނެއްޓުނީ ސީދާ ކީއްވެކަމެއް ބުނަން އަދި ނޭނގެ އެވެ. އެ ވަގުތަކީ ދެ ދުވުންތެރިޔަކު ޕޭމަންޓު ކައިރިން އެ ސަރަހައްދުން ދުވެފައިދިޔަ ވަގުތެކެވެ. އެ ދެ ދުވުންތެރިން ފެނުމުން ސްޕީޑް މަޑުކޮށްލަން ކުއްލިއަކަށް ބުރެކި ޖެއްސީ ކަމަށް ވެސް ވެދާނެ ކަމަށް ސޯޝަލް މީޑިއާގައި ބައެއް މީހުން އެބަ ބުނެ އެވެ.

އެ ވަގުތު މަގު ތެމިފައި އޮތުމުން އެހެންވީ ކަމަށް ވެސް ވެދާނެ އެވެ. ފޮޓޯތަކުން ފެންނަ ގޮތުގައި ކާރުގެ ފަހަތު ފުރޮޅު ހުރީ ވަރަށް ބޮޑަށް ގޭނި އޮމާންވެފަ އެވެ. އެހެންވުމުން އެހާ ބާރު ސްޕީޑުގައި ދުއްވާފައިދާ ކާރެއް ކޮންޓްރޯލުން ނެއްޓުމަކީ އެކަށީގެންވާ ކަމެކެވެ.

އެ ވީޑިއޯ އިން ފުރަތަމަ ފެންނަނީ ބޮޑުތަކުރުފާނު މަގުގެ ހުޅަނގު ކޮޅަށް ދުއްވާފައި ދެ ލޮރީއެއްދާ ތަނެވެ. ދެން ފެންނަނީ ހުދު ކުލައިގެ ކާރެއް ދާ މަންޒަރެވެ. އިރުކޮޅެއް ފަހުން ފެނުނީ އެ ސަރަހައްދުން ދުއްވާފައި އައި ރަތްކުލައިގެ ރޭސް ކާރު ކޮންޓްރޯލުން ނެއްޓި އެނބުރިގަންނަ ތަނެވެ. އެނބުރުން ކޮންޓްރޯލް ނުވެ ބަހުގެ ކުރީކޮޅުގައި އޭގެ އަރިމަތި ޖެހޭތަން ފެނެ އެވެ. އެކަމުގެ ސަބަބުން ކާރުގެ ފަހަތުކޮޅު ކުއްލިއަކަށް ފުނޑު ފުނޑުވެ އެވެ.

އެ އެކްސިޑެންޓް ހިނގުމާއެކު ދެ ދުވުންތެރިން ގޮސް ކާރުގައި ތިބި މީހުން ނަގަން މަސައްކަތް ކުރާތަން ވީޑިއޯއިން ފެނެ އެވެ.

ގިނަ ބަޔަކު ބުނަނީ މި އެކްސިޑެންޓް ހިނގަން މެދުވެރިވީ ބާރު ސްޕީޑުގައި ދުއްވާފައި ދިޔަ ކާރު ކޮންޓްރޯލުން ނެއްޓިގެން ދިއުމުން ކަމަށެވެ.

އެ އެކްސިޑެންޓްގައި ޖުމްލަ ހަ މީހަކަށް އަނިޔާވި އެވެ. އޭގެތެރެއިން އެކަކު ވަނީ މަރުވެފަ އެވެ. އަނެއް ފަސް މީހުންނަށް ހޮސްޕިޓަލްގައި އަންނަނީ ފަރުވާދެމުންނެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. މިކަމުގެ ފުރިހަމަ ހަގީގަތް އެނގޭނީ ތަހުގީގު ނިމުމުންނެވެ.